Хюрккарин гъул Табасаран райондин аьхю гъуларикан саб ву. ИкибаштIан, гъулан кьадарназ лигну, душваъ айи бицIидарин кьадарра гизаф ву. Хъа гизаф бицIидар айи йи-шваъ аьхю мектебра чарасуз лазим ву.
Хюрккарин гъулан кьялан мектеб райондиъ айи аьхю мектебарикан саб вушра, гъийин йигъаз мушваъ дусру йишвар варидариз гьуркIрадар ва гъулан бицIидари мектебдиъ 3 сменайиъди урхури, швнуд-сад йис ву. Хюрккарин мектебдин читин гьял гьисабназ гъадабгъну, гъулаъ гьаму деврин шартIарихъди тямин дапIнайи цIийи мектеб тикмиш апIуб чарасуз лазим вуйиваликан кIури ва му метлебназ кюмек тIалаб апIури, райондин кIулиъ айидарра республикайин гьюкмарихьна хъади-хъади илтIикIури хайлин йисар ву.
Магьа цци «Образование» милли проектдин дахилнаъди Хюрккарин гъулаъ 500 бицIириз дусру йишвар айи цIийи мектеб тикмиш апIуз хъюгъну. Гъубшу гьяфтайиъ улихьдин вахтари совхоздин багъ алди гъабхьи «Тина хирар» кIуру йишв’ин мектебдин шибритI ипну.
Мектебдин тикилишчивалин ляхнар «Стройоригинал» ООО-йи кIули гъахиди. Гъийин йигъаз асас вуди алабхъурайи читинвал гьадму вуки, мектеб диврайи йи-шванна гъулан арайиан нир гъябгъюра. Гьаддиз, мектебдин тикилишчивалин ляхнар ккергъайиз, дина гъябгъюрайи 250 метрин рякъ рас гъапIну, хъасин мектеб дивру йишв дюз апIуз хъюгъну. Мидланра гъайри, гележегдиъ мектеб тикмиш апIру йишвахьна тикилишчивалин материалар гъахбан бадали, жара йишвхьандира рякъ апIуз планламиш дапIна.
Къайд апIуб лазим ву, улупнайи пландиинди Хюрккарин гъулаъ диврайи цIийи мектебдин тикилишчивалин ляхнар 2023-пи йисан ахьириз ккудукIиди, душваъ бицIидариз урхуз цIийи мектебдин 5 корпус дивди.