Ккудубшу киш йигъан Мягьячгъалайиъ, Пушкиндин ччвурнахъ хъайи кючейиъ, дагъустан халкьарин мукьмарра йивури, шадвалин машкварси Дагъустан Республикайин гъулан мяишатдин ва ипIру-убхъру сурсатарин, гьясиллувалинна ариш-веришдин министерствйирина Мягьячгъала шагьрин администрацияйи сатIиди тешкил дапIнайи гъулан мяишатдин сурсатарин республикайин ярмарка гъабхьну.

 

Ярмаркайиъ Дагъустандин саки вари районарин гъулан мяишатдин сурсат гьясил апIурайи 200-дихьнакьан идарйир, хусуси мяишатар иштирак гъахьнийи.
Му йигъан ярмаркайиъ масу туврайи гъулан мяишатдин сурсатарин кьиматар базрариътIан 20%-дин ужузди вуйи. Гьаци, 1 кило малин йи-ккун кьимат 300 манат, хъа чарвайин йиккун – 330-350 манат вуйи.

Ярмаркайин иштиракчи, Табасаран райондин ТIаттил гъулан «Занак» СПОК-дин кулиъ айи Пирмягьямед Абакаровди (шиклиъ) мялум гъапIганси, му ярмарка шулайиб мялум гъабхьиган, думу чпин мяишатдиъ гъабхьи тIумтIин бегьерра хьади мина гъюз мажбур гъахьну.

«Ярмаркайиъ иштирак шули сабпи раж вушра, муштарйир гизаф гъюра, хъанара сурсат хьади гъачай, кIурайидарра а. Ич мяишат гьелелиг тазади ляхин апIуз хъюбгънайиб вуйич. Ич ляхниъ варитIан асасуб – гьавайин шартIар ву. Эгер гьава маниб гъабхьиш, бегьерра ужуб шулу. Хъа ляхин апIури сабпи йис вушра, цци бегьер ужуб гъабхьунчуз. Гъи гьаму ярмаркайиъ иштирак хьували гьамусдихъан тина ич сурсатар масу гъадагъру муштарйир артухъ хьпаз тясир апIиди кIури, умуд кивраза», – гъапну Табасаран райондиан вуйи ярмаркайин иштиракчийи.