Аьхиримжи йисари, Урусатдин Правительствойин къарар тамам апIури, федеральный бюджетдин дакьатарихъ республикайин шагьрарин ва районарин мектебариз гьар йисан цIийи автобусар жара апIура. Магьа ццира республикайиз жюрбежюр маркйирин 116 автобус тувну.
29-пи октябриъ Мягьячгъалайиъ Лениндин ччвурнахъ хъайи майдандиин районарин ва шагьрарин образованиейин управленйирин кIулиъ айидарихьна цIийи автобусар тувбаз бахш дапIнайи сережем кIули гъубшнийи. Вахтназ вуди РД-йин образованиейин ва илмин министрин вазифйир тамам апIурайи Ягь’я Бучаевди гъапиганси, автобусар гизафси дурариъ игьтияж айи 39 муниципалитетарин мектебариз жара апIиди. «Автобусарин ишлетмиш’валин вахт 10 йис ву. Гьаму муддат улдубчIвубси, муниципалитетарихьан, цIийи автобусар тIалаб апIури, министерствойиз илтIикIуз шулу», – къайд гъапIнийи дугъу.
ЦIийи автобусар гъурукьу районарин арайиъ Табасаран ва Хив районарра а. Дупну ккундуки, 2020-пи йисанси, ццира варитIан гизаф автобусар – 10 аьдад – Табасаран райондин мектебариз жара гъапIну. Сач, кIваин апIурача, Табасаран райондин мектебариз 14 автобус тувнийи. Табасаран райондин образованиейин управление-йиан учуз туву мялуматариинди, му автобусар 10 мектебдин балансдиина тувди. 13-20 касдиз деъру йишвар айи «Газель» автобус Зил, Гелинбатан, Акъа, ЧвулатI, Кюрягъ, Пилигъ, Гьесихъ гъуларин кьялан мектебариз ва Хючнаарин 2-пи нумрайин кьялан мектебдиз, хъа 10-12 касдиз дусру йишвар айи бицIи жюрейин автобусар – ГьепIил ва Шилла гъулан мектебариз жара апIуз кка. Мектебарин директорарихьна автобусарин жюлгер тувбан серенжем 4-пи ноябриъ Хючна гъулаъ кIули гъябгъиди.
Хив райондин ГъуштIларин кьялан мектебра саб цIийи автобусдин эйси гъабхьну.
Дупну ккундуки, улихьна йисари «Мектебдин автобус» кIуру федеральный программайиинди, Табасаран райондин мектебариз 25 автобус, Хив райондин мектебариз 4 автобус жара гъапIнийи. Аьтрафар аьхю ва агьалйирин кьадар артухъ духьнайи бязи табасаран гъуларин мектебариъ хайлин баяр-шубари урхура, хъа саспи гъуларин мектебариъ – кьюб сменайиъди. Гьаддиз баяр-шубариз чвулин ва кьюрдун вахтна дарсариз гъягъюз, хябяхъган ухди мучIу шлуган мектебдиан гъюз читинди алабхъуйи. ЦIийи автобусари думу месэла арайин адабгъуз кюмек тувра.
