Чвлин аьхиримжи вазлиъ мидиз улихьна кьабул дапIнайи федеральный 118 къанунар гьяракатнаъ учIвра. Дурарикан саспидари урусатдин ватандашарин яшайишдиз ужувлан тясир апIиди.
Ноябрин ваз вари уьлкейиъ дилихру гьяфта мялум апIувалилан ккебгъну. Анжагъ ипIру-убхъру сурсатарин ва чарасуз лазим вуйи шей’арин туканари, аптекйири, сагъламвал мюгькам апIбан тешкилатари ва стратегия жигьатнаан важиблу идарйири ляхин апIури гъузну.
1-пи ноябрихъан пенсионерарин саб жерге гъатариз пенсияйиин пул иливиди. Думу сиягьнак улихьган кIару гъван адабгъру промышленностдиъ гъилиху гъуллугъчйир, муганайиз ватандаш’валин авиация-йиъ зегьмет гъизигдар, 2021-пи йисан июлин вазлихъан ляхниан удучIву пенсионерар, гьаму йисан октябрин вазлиъ 80 йис тамам гъабхьидар ва Ленинграддин блокадайин иштиракчйир кахьра.
Муганайиздин шахтерариз ва летчикариз тялукь вуди 3873 манат ва 19584 манат иливиди. Блокадайин гьарсар иштиракчийиз 1-пи ноябрихъан 50 агъзур манат тувуз хъюгъди. Мялум вуйиси, му пособие 75 агъзурихьна касди гъадабгъиди, гьадму гьисабнаан Урусатдин Федерацияйин сяргьятарилан тинди дуланмиш шулайидарира.
Гьаму вазлилан башламиш дапIну, банкдин гъуллугъарин кюмекниинди пул хътапIруган, зиълан ктабгъру комиссияйин кьадар дигиш шула. Гьаци хусуси касарин арайиъ 100 агъзурихьна пул хътапIруган, комиссия алдарди, пулсузди хьибди. Эгер хътапIурайи пулин кьадар 100 агъзуртIан артухъ вуш, комиссияйин кьадар хътапIурайи пуликан 0,5 процент хьибди, амма 1500 манаттIан артухъ дубхьну ккундар. Мидиз улихьна му шартIар саб банкдин арайиъ вуйи гьяракатариз хас вуди гъахьнуш, гьамусдихъан тина урусатдин ватандашарихьан жюрбюжюр банкарин арайиъ вуйи гьяракатариъра дурарикан мянфяаьт ктабгъуз хьибди.
Гьаму вазлиъ Урусатди 13 уьлкейихъди (Иран, Норвегия, ОАЭ, Таиланд, Швеция, Швейцария, Австрия ва гь.ж.) авиацияйин аьлакьа башламиш апIура: Гьацира Египетдин Хургада ва Шарм-эль-Шейх курортариз кми-кмиди вуйи рейсар ачмиш апIиди. Нояб-рихъан Италияйиз, Грецияйиз, Венгрияйиз, Македонияйиз, Албанияйиз вуйи рейсарра артухъ хьиди.
1-пи ноябрихъан машинарин ПТС гъадабгъбан къайдара дигиш хьибди.
Улихьганси транспортдин дакьатарин кагъзин паспорт гъубзидар. Гьамусдихъан тина ПТС электрондин жюрейиинди тувиди. Гьаддихъди сабси, улихьган тувнайи кагъзин жюрейин документарра гьяракатнаъ гъузиди. Дурар дигиш апIуб лазим хьибдар.
