10-пи ноябриъ Урусатдин МВД-йин гъуллугъчйири чпин пишекарвалин Йигъ къайд гъапIну. Му цирклиъ Ватандиз вафалувалиинди гъуллугъ апIурайи ва жямяаьтлугъдин хатIасузвал уьбхбан ляхин намуслувалиинди кIулиз адабгъурайи ихь ватанагьлийирин кьадарра цIиб дар. Хайлин йисари Дагъустандин Огни шагьриъ участковыйди лихурайи Казим Рамазановра гьадрарикан сар ву.
Къайд дапIну ккундуки, Казим Рамазановси, дугъан аьхюну гъардаш Аьли Рамазановра Дагъустандин Огни шагьриъ Урусатдин МВД-йин гъуллугъчиди лихура. Рамазановарин хизанди ватандихьна вуйи ккунивал, чпин гъуллугънан вазифйир тамам апIбаъ заан жавабдарвал ва нумуна улупура. Улихьна йигъари, Урусатдин МВД-йин гъуллугъчйирин машквар тебрик апIбан бадали, узу Рамазановарин хулаз гъушнийза, анжагъ узуз бицIину гъардаш Казим РамазановтIан ала-хъундайзуз. Дугъахъди гъабхьи ич сюгьбат исихъ чап апIурача.
– Казим Селимханович, саб гъапиб, уву пишекарвалин машкврихъди мубарак апIураза, ва, кьюб кIуруб, учвуз, кьюрид чвйиризра, саб ляхниъ лихувал фици кьисмат гъабхьнуш, ктибтуб ккун апIураза.
– Машкврихъди тебрик апIбаз чухсагъул! Хъа учу, кьюрид гъардшарра, МВД-йиъ лихбакан улхуруш, йиз фикриинди, гьарсар жигьил гьаммишан чан ватан уьбхюз гьязурди духьну ккунду. Узу гьеле мектебдиъ урхури имиди полицияйиъ ляхниъ дийигъбакан фикрар апIури гъахьунза. Ва гьамци, 2007-пи йисан мектеб ккудубкIбалан кьяляхъ, йиз аьхюну гъардаш Аьлдин теклифниинди, узу ДГПУ-йин управлениейин ва правойин факультетдик урхуз кучIвунза. Думу ккудубкIбалан кьяляхъ, 2012-пи йисан Дагъустандин Огни шагьриъ Урусатдин МВД-йин ППС-дин гъуллугънаъ ляхниъ учIвунза, хъа 2016-пи йисхъан мина Черёмушки участокдиъ полицияйин вари ихтиярар айи вакилди лихураза.
– Читинвалар алахьури шулин?
– Участковыйдин ляхин, гюзчивал гъабхури, кючйириъ низам-къайда уьбхювал ву. Хъа гъийин деврин инсанарихъди ва му заманайин баяр-шубарихъди ляхин апIувал читинди алабхъуру. Узу гюзчивал гъабхурайи кючйирин месэлйир гьял апIру вахтна, мисалназ, суддин приставарин гъуллугънан, прокуратурайин ва хайлин жара органарин вакилар гъафишра, сабпи нубатнаъди узуз дих апIуру. Фици гъапишра, му йишван жавабдарвал гъабхурайир узу вуза.
– Гизафси алахьру ва гьял апIру месэлйир фицдар вуйив?
– Гизаф пай алахьурайи месэлйир хизанарихъди аьлакьалудар ву. Гъийин девриъ хизанар даргъбахъди аьлакьалу месэлйир гьял апIувал гизаф алахьуразуз. Ухьуз мялум вуйи-ганси, му месэла гьял апIувал гъийин ич ляхниъ варитIан гъагъиди алабхъурачуз. Гьаз гъапиш айи шейъ-шюйъ жара апIбан, баяр-шубар жилири чан терефназди, хпири чан терефназди зигбан ва гьамцдар жара месэлйири саспи вахтар яманди инжик апIуру. Гьамусяаьт жилирна хпир жара хьувалин дюшюшар жигьиларин арайиъ гизаф шула. Девир дигиш дубхьна, белки, живанарин хасиятар дигиш хьувалра гьаддикан асиллу вушул. Абйир-бабар жара хьували аьхюну пайси баяр-шубариз чIуруди тясир апIуру. Хъа думу ляхникан дурари фикир апIури адар.
Гъи шагьрин кючйириъ ляхниъ адру жигьилар гизаф а. Мисалназ, узу гъуллугъ апIурайи участок Черёмушки ву. Душваъ 1-пи нумрайин кьялан мектеб, жюрбежюр карханйир ва тешкилатар ерлешмиш духьна. Мушваъ узу, урхурайи ва лихурайи жигьиларин, иллагьки яшнакк ккуркьну адрударин аьгьвалат дериндиан ахтармиш апIури, дурарихъди гюрюшар гъахури, яркьуди тербия тувбан ляхин гъабхури шулза. Натижайиъ узу гъуллугъ апIурайи учас-токдиъ тахсиркарвалар апIувалин дюшюшар цIибди шулиз. Гьелелиг узу лихурайи участокдиъ гъагъи тахсиркарвал дапIнадар. Гьаммишан яшнакк ккуркьну адрударин арайиъ тахсиркарваларин профилактика апIувал, баяр-шубариз дюз рякъ улупувал – му йиз ляхнин асас вазифа вуйиз.
Жюрбежюр участокариъ полицияйин вари ихтиярар айи вакиларин ляхин, дугъриданра, гизаф жавабдар ляхин ву. Казим Рамазановди учв ляхниъ анжагъ ужуб терефнахъанди, туву табшуругъ вахтниинди ва ерийиинди тамам апIру, низам хъайи, савадлу гъуллугъчиси улупура. Чахъди лихурайидарин ва чав гюзчивал гъабхурайи участокдин агьалйирин арайиъ дугъаз аьхю гьюрмат а. Инсанарихъди гаф-чIал апIуз аьгъювали дугъан ляхниъ аьхю роль уйнамиш апIура, хъа дугъаз дицисдар удукьувалар а.
Ляхниъ гъазанмиш апIурайи хъуркьуваларин натижйириз лигну, руководствойин терефнаан думу швнуб-саб ражари лишанлура дапIна.
Гьелбетда, тярифназ ла-йикьлу гъуллугъ апIувал – му аьхю хъуркьувал ву. Казим Рамазановдиз ихь халкьдин архаинвал уьбхбан ляхниъ аьхью хъуркьувалар ккун апIурхьа.
