Чвлин фаслин аьхир ва кьюрдун эвел – му варитIан гизаф уьзрар тарагъру вахт ву. Духтрари думу вахтнан уьзрариз жикъиди ОРЗ кIуру. Гьаму фаслариъ грипп тарабгъуру. Хъа гъи, ухьуз рябкьюрайиганси, ОРВИ-йин уьзур, гьяракат дапIну, коронавирусдин уьзрин тIягъвниз илтIибкIура. Коронавирусдин уьзриз аьксиди фицдар серенжемар кьабул дапIну ккундуш гьерхри, узу Дагъ. Огни шагьрин ЦГБ-йин эпидемиолог Эрада Бедьятовайихьна ва Дербент райондин ЦРБ-йин эпидемиолог Эльмира Мирзоевайихьна илтIикIунза.
Эрада Изетовнайихъди кIули гъубшу ич сюгьбатнаъ дугъу гъийин девриъ ковид-19 уьзур инсанарин арайиъ фициб саягъниинди илтIибкIну тарабгъураш, ктибтнийи.
– Аьхиримжи йисари гьаз-вуш инсанарин арайиъ тIягъвнар хъади-хъади тарагъуз хъюгънайи, амма фунуб узрианра кетIерццнайидар сагъ апIуйча. Хъа гъи COVID-19 уьзрихъди аьлакьалу аьгьвалат гьеле гъагъиди гъубзна. Гьаддиз ухьхьан архаин хьуз шуладар. Коронавирус фициб гьяракатниинди тарабгъуруш, гьамус варидариз аьгъя. Инсандиз учв саб бицIиди кетIерццнайиваликан хабар хьайиз, дугъу чакантина жара касарра аьзарлу апIуру. Къайд апIураза, гизафси зарар му уьзур ликриин илмиди сагъ апIуз ккунидари тувру. Гьаддиз ухьу коронавирусдин уьзур тарабгъувализ рякъ тувну ккундар ва медицинайин гъуллугъчйирихъди сатIиди дидиз аькси кьатI’и серенжемар духну ккунду. Дицдар серенжемар гъахуз гьамус лайикьлу дакьатар а, сабпи нубатнаъ ухьуз тувнайи вакцинайин рубар йивувал. Гьамусяаьт Дагъустандин Огни шагьрин ЦГБ-йин уьру зонайиъ 26 аьзарлуйир а. Хъа амбулаторияйиъ сагъ апIурайидарин кьадар 31 кас ву. Инсанари коронавирусдиз аькси вакцинайин рубар йивуз хъюгъю йигъланмина аьзарлуйирин кьадар цIиб хьуз хъюгъну.
Читинуб гьадму вуки, саспи инсанари в акцинайин руб йивбаккан кIул ккадабгъуру. Му тIягъюн гьелелиг яваш апIузра дубхьнадар. СацIиб мичIлишнар гъахьибси, думу, аьксина, хъана яркьуди тарабгъуб мумкин ву.
Дербент райондин ЦРБ-йин кIулин духтрин заместитель Эльмира Руслановнайи COVID-19-дихъди аьлакьалу аьгьвалатнакан гьамци ктибтнийи:
– Гьамусяаьт Дербент райондин агьалйири коронавирусдиз аькси прививкйир апIурашра, ич гьисабариинди, кетIерццнайидарин кьадар йигълан-йигъаз артухъ шула. Ва гъийин йигъан инсанар аьзарлу хьпан себебра хайлин касари чиб дюз дарди гъахурайивалихъди аьлакьалу ву. Вакцинайин руб йивну имиди, дицир кас инсанар гъварч шлу йишвахьна душну ккундар, дугъу чан беден маниди дюбхну ккунду. Гизаф уьзрар бедендиз аьхъю гъабхьиган, арайиз гъюру. Ва духтрари кIурайи тIалабар чарасуз вуди тамам дапIну ккунду. Му уьзриан гьамусди аьзарлу хьуз варитIан хатIа айидарикан садар гъагъдиъ айи дишагьлийир ву. Дурарин иммуный гъурулуш иллагьки зяйифди шулу. РД-йин сагъламвал уьбхбан министрин заместитель Раиса Шагьсиновайи гъаписи, гьамусяаьт ихь республикайиъ коронавирусдин уьзриан гъагъдиъ айи 68 дишагьли кетIерццна, гьацира гъийихдарра а. БицIидарин арайиъра коронавирусдиан кетIерццнайидар а, хъа йихувалин дюшюшар адар. Маншаллагь, ихь духтрарира чпихьан шлу зегьмет зигура. Гьамусяаьт вакцинайин рубар йивнайидарин кьадар 23812 кас ву. Гизафси яш 55-65 йис дубхьнайидари вакцинайин рубар йивна.
Духтрари коронавирусдиз аькси вакцинайин рубар йивурадар кIури, учуз хабрар гъюри шулу. Учу сарпидарди рубар гъивунча. Духтрари рубар йивурадар пувал – кучIлин гафар ву.
Ич метлеб – ихь халкьдин сагъламвал уьбхювал вуйич.
