КIури шулу: «Ужувлаз я миллет, я дин айиб дар». Мурар гьавайиди дупнайи гафар дар.
Гъи узуз йиз макьалайиъ Дагъустандиз Нижний Новгород шагьриан туристарди гъафи Павел ва Анастасия Щербаковарин хизандикан бикIуз ккундузуз.
Ухьуз гьар йигъан республикайиъ шулайи йицIбариинди аварйирикан ебхьурахьуз. Дурарин аьхюну пай шофёрари машинар рякъюн къаршу терефназ адаувал себеб вуди арайиз гъюрайидар вуйиваликан ва натижайиъ тахсир ктру инсанариз, хизанариз аьхю бедбахтвалар хурайиваликанра аьгъяфхьуз. Магьа гьамциб бедбахтвалин дюшюшнакк Щербаковарин хизанра ккабхъну.
Сентябрин вазлиъ Дагъустандиз дуфнайи туристар, арендайиз машин гъадабгъну, АхцIигь райондиз гъягъюрайи вахтна, дурар гъягъюрайи рякъюн зулизди удубчIвну, зарбди хъапIрайи жара машин гьамрарин машиндихъ гъивну. Натижайиъ Анастасияйин гардандин гьар гъюбгъну, дугъаз хайлин жара зийнарра гъахьну, хъа дугъан уьмрин юлдаш Павел хатIасузвалин гутайи гъюрхнийи. Дишагьли, гъагъи гьялнаъ ади, саки вазлин арайиъ реанимацияйиъ дахъну имийи. Му гьядисайикан хабар гъабхьиган, республикайин «Марцци юкIв» рягьимлувалин фондну дишагьли Москва шагьриъ айи «Шубур чи» кIуру клиникайиз реабилитацияйиз гьаъну. Амма думу сагъ апIуз хизандин дакьатар гьудруркIрайивализ лигну, хизандиз кюмек апIбан бадали, фондну 400 агъзур манат уч дапIну ккуниваликан мялум гъапIну. Дагъустанлуйири, му хизандиз дубхьнайи бедбахтвал чпиин улубкьу кьазаси гьисаб дапIну, кьюд йигъандин арайиъ 500 агъзур манат уч гъапIну.
Гьядисайикан хабар гъабхьи РФ-дин Государствойин Думайин депутат Ризван Къурбановди ва дугъан кюмекчи, ихь ватанагьли Рустам Бегеринди му хизандиз чпин кюмекнан хилра гьачIабккну.
«25 йигъан реанимацияйиъ ади, гьамус палатайиз адагънайи Анастасияйи гардандиккансина чан беден зат гьисс апIудар. Ич «Марцци юкIв» фонд, агъзрариинди дагъустанлуйирин хизанаризси, гьаму хизандизра кюмек апIуз мажбур гъабхьну – Павелна Анастасия Москвайиз клиникайиз гьаунча.
Гьамусдихъантина му читин аьгьвалатнаъ ахъу хизандиз лигувал ва Анастасия уччвуди сагъ хьайизкьан дугъаз лазим вуйи кюмек апIувал учу уч’ина гъадабгъунча. Фицики, я диндиз, я миллетдиз дилигди, читин аьгьвалатнаъ ахъу инсандин бедбахтвал жвуванубси гьисаб дапIну, дицир касдиз кюмек апIувал ихь буржи ву»,
– къайд гъапIну Рустам Бегеринди.
