Республикайин сагъламвал уьбхбан министерствойин ва РД-йиъ айи Роспотребнадзорин Управлениейин улупбариинди, Дагъустандиъ эпидемиологияйин гьял гьелелиг читинуб ву.
Саб терефнаан коронавирусдиан инсанар ктIерццувал цIиб хьуз хъюбгъна, хъа тму терефнахъан – дурар сагъ хьувалин улупбар исккандар ву. Гъи агъзрариинди инсанари, коронавирус уьзриан кетIерццну, жвуван сагъламвал мюгькам апIура, гьар йигъан думу хяви уьзриан йихурайидарра шула.
Улихьна йигъари Дагъус-тандин Глава Сергей Меликовди коронавирусдихъди женг гъабхбан Гьяракатнан штабдин заседание кIули гъубхну. Дугъу къайд гъапIганси, коронавирусдин «Омикрон» кIуру цIийи штамм тарабгъуз хъюбгъиш, гьял гъизгъин хьуб мумкин ву. Дидин заан зегьерлувал гьисабназ гъадабгъну, федеральный гьюкмари ПЦР-тестарин гьяракатнан вахт 72 сяътилан 48 сяътиина ис апIбан къарар адабгъну. Гьаддихъди аьлакьалу вуди республикайин къанунчивалин актариъ дигиш’валар тIаъди. Гьацира республикайин кIулиъ айири, коронавирус улихь ккимиди ашкар апIбан бадали, думу ахтармиш апIувалин кьадар швнуб-саб ражари артухъ апIбан месэла дивнийи.
Гьаддихъди сабси, коронавирусдиз аькси рубар йивувалин ляхинра жанлу дапIну ккуниваликан гъапнийи. Декабрин эвелариз вуйи улупбариинди, республикайиъ рубар гъивдарин кьадар 685 агъзуртIан артухъ ву. Му месэлайиан 3 муниципалитетди чпин улихь дивнайи вазифа тамам гъапIну: Хив районди (88,7%), Докъузпара районди (82,1%) ва Гумбет районди (81,2%).
Вахтназ вуди РД-йин сагъламвал уьбхбан министрин вазифйир вахтназ вуди тамам апIурайи Татьяна Беляевайи туву мялуматариинди, гьамусяаьт республикайиъ коронавирусдиан кетIерццнайидарин кьадар 1909 кас ву. Аьхиримжи суткайиъ, яна 15-пи декабриъ, 155 кас аьзарлу гъахьну, 12 — гъийихну. Дагъустандиъ коронавирусдиан йихурайидарин кьадар имбу регионариътIан 1,67 % зиина ву. Аьзарлу гъахьи гьар 1000 касдикан 48 кас йихура. Гьял лап гъагъи гъабхьигантIан, инсанар больницйириз илтIикIурадар.
Эпидемиологияйин гьял ужувлахъинди дигиш шуладар. Гьаддиз коронавирусдихъди аьлакьалу вуди кьабул апIурайи уьлчмйир буш апIуз гьелелиг ухди ву.
