Улихьна йигъари Хючна гъулан 1-пи нумрайин многопрофиларин лицейдиъ «Табасарандин йисандин мялим – 2022» муниципальный конкурс кIули гъубшну. Конкурсдиъ иштирак’вал апIуз райондин 22 мектебдиан аьрзйир хъадаънади гъахьну, хъа иштирак хьуз 16 конкурсант деетну.
Сабпи йигъан мялимари «Мялим – ужурсир пишекар» конкурсдин дахилнаъди чпин методикайин устадвал улупну. Аьдат вуйиси, презентацияйин натижйириз лигну, жюрийи финализ ужударстар мялимар гъядягъюру. Гьаци кьюбпи туриз 6 кас гъузну.
15-пи декабриъ финалистари «Табасаран райондин гимназия» МКОУ-йиъ мастер-классар кIули гъухну. Дурари ФГОС-дин тIалабариз жаваб тувру жюрейиинди чпин педагогвалин ляхин, пишекарвалин заан удукьувалар улупури, душваъ урхурайидариз дарсар кивну.
Конкурсдин вари иштиракчйири чпи дарсар киврайи предметариан заан аьгъювалар айивал, урхурайидариз жюрбежюр мяднариан мялуматар гъадагъуз мумкинвал туврайивал, чиб-чпихъди талит тешкил апIуз улупурайивал ва мялимвалин жара удукьувалар ашкар гъапIну.
Конкурсдин натижйириинди ужурсир вуди СертIил гъулан СОШ-дин мялим Рамазан Рамазанов тяйин гъапIну. Кьюбпи йишв Хючна гъулан 1-пи нумрайин гизаф профиларин лицейдин мялим Аксана Рустамовайиз, хъа шубубпи йишв Улуз гъулан кьялан мектебдин мялим Ражаб Шихмягьямедовдиз тувну.
