Коронавирусдин «Омикрон» кIуру цIийи жюрейин штаммдиан аьзарлу духьнайи инсанар Урусатдиъра ашкар шула. Гьамусяаьт вари уьлкейиъ ва ихь республикайиъ тарабгънайи «Дельта» штаммтIан му жюре инсаниятдиз лапра хатIалубси гьисаб дапIна.
Сабпи ражари Омикрон-штамм Урусатдин Феде-рацияйин сяргьятариин 2011-пи йисан декабрин аьхирариъ, ихь туристар Кьибла Африкайиан хъадакну гъюблан кьяляхъ, ашкар гъабхьнийи.
Улихьнаси РФ-дин сагъламвал уьбхбан министр Михаил Мурашкойи къайд гъапIганси, гъийин йигъан Урусатдин регионариъ «Омикрон» вирус харижи уьлкйириан гъафидарикси, ихь гьюкуматдиан затра жара йишвариз дурушу инсанарикра ашкар шула. Министрин гафариинди, му штамм лапра хатIалуб ву, гьадму регионариъ ихь ватанагьлийирин сагъламвал уьбхбахъан жавабдарвал гъабхурайи гъуллугъчйири, думу тарарабгъбан бадали, Омикрондин хатIалуваликан инсанариз хабар тувру мюгькам уьлчмйир кьабул дапIну ккунду.
Сабсана далил: духтрарин гафариинди, коронавирусдиз аькси прививка дапIнайидарикнара Омикрон тарабгъбан дюшюшар алахьуру. Гьаддиз иццру гъахьидари хулаъ чпин кIул’инди сагъ’вал ужу апIбан курс ккебгъувал дюз дар. Иццру гъахьир вахтниинди духтрарихьна илтIикIну ккунду.
Гъийин йигъаз Урусатдиъ Омикрон вирус кади 300-тIан артухъ аьзарлу гьисабназ гъадагъна.
Дагъустандикан улхуруш, улихьнаси региондин саб жерге СМИ-йин дакьатари коронавирусдин «Омикрон» кIуру цIийи штамм ихь республикайиъра ашкар дубхьнайиваликан дюз дару мялуматар тувнийи. 11-пи январиъ Дагъустан Республикайин Глава Сергей Меликовди кIули гъубху, коронавирусдин инфекцияйихъди женг гъабхбан Оперштабдин сабпи заседаниейиъ региондин Роспотребнадзорин кIулиъ айи Николай Павловди мялум гъапIганси, 11-пи январиз Дагъустан Республикайиъ «Омикрон» штаммдиан инсанар аьзарлу хьпан дюшюшар ашкар духьнадар.
Къайд апIуб лазим вуки, гьар йигъан республикайин лабораторйириъ, коронавирусдин цIийи жюрейиан аьзарлу духьнаш ахтармишар гъахури, 9-10 агъзурихьна инсанарин тестар гъадагъура.
Республикайин аьт-рафариин али ПЦР-ди-агностикайин лабораторйири цIийи йисан машквран ва элгьет йигъарира чпин ляхин дебккундар.
Хъа гьамусяаьт тарабгънайи коронавирусдин инфекцияйикан улхуруш, Дагъустандиъ 11-пи январиз коронавирусдиан 66923 кас аьзарлу гъахьну. ПЦР-диагностикайин лабораторйириъ 3696511 тест ахтармиш дапIна.
РД-йиъ айи Роспотребнадзорин управление-йин кIулиъ айидари республикайин вари агьалйириз, хъа асас вуди яшлуйириз ва сагъ апIуз даршлу гъагъи уьзрар кайидариз, инсанар гизаф уч шлу йишварихьан гъирагъдиъ гъузну ккуниваликан, жвуван марццишан уьбхбакан, коронавирусдихьан жвув уьрхру къайдйир чIур дапIну дакк-ниваликан, жандин гьавйир гъагъи гъахьнуш, хулаъ гъузуваликан ва чарасуз вуди духтриз дих апIуваликан кIваин апIура.
Коронавирусдихъди аьлакьалу месэлйирин гьякьнаан гьарсар касдихьан «убцру линияйин» саб вуйи телефондиз +7 800 350 00 63 зенг апIуз ва лазим вуйи мялуматар гъадагъуз шулу.
