Дагъустан Республикайин гъулан мяишатдин цирклариъ багъбанчивали ужудар хъуркьувалар улупура. Мисал вуди гъадабгъиш, ккудубшу йисан республикайиъ сабпи ражари вуди 200 агъзуртIан артухъ тонна йимишарин бегьер уч гъапIну. Думу кьадар 2020-пи йисантIан 9,9%-дин артухъди ву. Мидланра гъайри, Дагъустандиъ гьар йисан уч апIурайи гилар айи йимишарин кьадарра, хъа гизафси мишмишарин, Урусатдин регионарин арайиъ варитIан гизаф ву – 70 агъзур тонна. Яна, натижйир йислан-йисаз заандар шулайиб рябкъюра. Гьаддихъди сабси, киврайи йимишарин багъларин кьадарра артухъ шула.
Магьа республикайин багълариъ хьадукран хъайивал апIбан ляхнар ккергъна. Гьаму йисан 1-пи январиз вуйи улупбариинди, республикайин аьтрафариин 29 агъзур гектариъ багълар итна. Гьадму кьадарнакан 22 агъзур гектариъ айи багълар бегьер хурайидар ву. Гьаддихъди сабси, аьхиримжи йисари республикайиъ гьарар гизаф гъалинди кивнайи багъларра ужуди артмиш шула.
Дагъустан Республикайин гъулан мяишатдин ва ипIру-убхъру сурсатарин министерствойин пресс-гъуллугънаан туврайи мялуматариинди, республикайиъ кивнайи дицдар багъларин кьадар гъийин йигъаз 4 агъзур гектар ву, ва дурарин гьацI пайну сарун бегьер тувра.
Ццийин йисан кивру багъларин кьадарнакан кIуруш, министерствойиан туврайи мялуматариинди, республикайин вари муниципалитетариъ кивуз планламиш дапIнайи йимишдин багъларин кьадар сабишв’инди 700 гектар ву. Гьадму гьисабарик ихь районарра кахьра. Табасаран райондиъ цци 25 гектариъ цIийи багълар итди. Гьадму гьисабнаан 3 гектариъ гизаф бегьер хру багълар ва гьацира райондиъ цци 114 гектариъ тIумтIин багъра ибтуз планламиш дапIна. Хъа Хив райондикан кIуруш, пландиинди 15 гектариъ, гьаддикан 1 гектариъ гизаф бегьер тувру гъалинди вуйи багълар кивуз планламиш дапIна.
Республикайин вари районар уьмумиди гъадагъиш, варитIан гизаф багълар кивнайиб Хасавюрт район ву. Душваъ гъийин йигъаз гизаф бегьер хру гъалинди кивнайи багъларин кьадар 600 гектартIан артухъ ву. Хъа Кьибла Дагъустандиъ кIуруш, варитIан улихь хьайи мяишат СтIал Сулейман райондин «Полоса» ООО ву. Му мяишатдиъ 1412 гектариъ йимишарин багъ кивна. Думу кьадарнакан 1000 гектариъ кивнайидар аьмлюхъяр, 380 гектариъ – вичар, 20 гектариъ – жихрар ва 12 гектариъ – беълийир ву.
Уч апIурайи йимишарин бегьернан кьадар артухъ хьувализ лигну, республикайиъ дурар уьрхру йишварра яратмиш апIуз уьлчмйир кьабул апIура. Региондин гъулан мяишатдин ва ипIру-убхъру сурсатарин министерствойиан туврайи мялуматариинди, гъийин йигъаз республикайиъ 22 агъзур тоннайин йимишар уьрхру йишвартIан адар. Сач гъулан мяишатдин карханйириз кюмек апIру гьюкуматдин программайин дахилнаъди 5200 тоннайин йимишар уьрхюз 3 йишв гьязур гъапIну. Гьелелиг му кьадарра республикайиз лап цIиб ву.
Зиихъ къайд гъапIу «Полоса» ООО-йиъ багарихьди 50 агъзур тоннайин йимишар уьрхру йишвар тикмиш апIбан аьхю проект уьмриз кечирмиш апIбиин машгъул хьибди, думу проектдин гьякьнаан сабпи ляхнар цци ккергъди.
