Цци, январин вазлин эвелиъ, Аьгьмед Насировди бабкан духьну 75 йис къайд гъапIну. Му ччвур Табасаран райондин агьалйириз ужуди аьгъя, фицики Агьмед Насиров хайлин вахтна райондин жавабдар гъуллугъариъ гъилихну. Думу гизафдариз сабурлу, инсанарихъди гаф-чIал апIуз аьгъю, гьюрмат уьбхру касси таниш ву.
Насиров Аьгьмед Рамазанович 1947-пи йисан 1-пи январиъ Табасаран райондин Цухдигъ гъулаъ бабкан гъахьну. БицIидихъанмина аьгъювалар гъадагъбахьна аьшкь айи Агьмед Рамазановичди сифте Цухдигъарин 7 йисандин мектебдиъ, хъасин 1960-1963-пи йисари Хючнаарин кьялан мектебдиъ урхури гъахьну. Математикайихъ юкIв хъайи жигьили, уьмрин рякъра дидихъди аьлакьалу апIуз ният дапIну, 1963-1968-пи йисари Дагъустандин гьюкуматдин университетдин физикайинна математикайин факультетдин математикайин отделениейиъ урхуру.
Пишекарвалин рякъ дугъу 1968-пи йисан Октябрин миржид йисандин (гьамусдин ЦIийи Лижв’арин) мектебдиъ директорин заместителин вазифйир тамам апIбалан ккебгънийи. Сад йислан думу эскервалин буржи тамам апIуз Советарин Армияйиз, Москвайиъ айи военный частназ гъягъюру.
Армияйиан гъафи жигьили 1970-1971-пи йисари Октябрин 8 йисандин мектебдиъ ляхин давам апIуру. Хъасин 1971-1974-пи йисари дугъаз райондин жюрбежюр мектебариъ лихувал кьисмат гъабхьну: НичIрасарин 8 йисандин мектебдиъ директорин заместителди, ТIюргъярин мектебдин директорди, Курккарин кьялан мектебдин директорин заместителди. Бажаранлу пишекрин хъуркьувалар рякъюри, райондин образованиейин отделиан дугъаз Табасаран райондин ОНО-йин инспекторди лихуз теклиф апIуру, ва Аьгьмед Насиров 1974-1983-пи йисари му гъуллугънаъ гъилихну.
1983-пи йисан сентябрин вазлиъ думу Табасаран райкомдин инструкторди дерккру.
1985-2000-пи йисари Табасаран райондин ОНО-йин заведующийди лихури гъахьи вахтна, Аьгьмед Насировди агьалйирин арайиъ ад гъазанмиш, чаз айи идара апIбан бажаранвалин удукьувалар ачмиш гъапIну. Образованиейин цирклиъ лихурайи тажрубалу мялимари, директорари Аьгьмед Рамазановичди райондин образованиейин цирклиъ арайиз гъахьи ужудар дигиш’валар, мялимариз лихбан бадали яратмиш апIури гъахьи тялукь шартIар гъира кIваина хури шулу.
Табасаран райондин образованиейин цирклиъ Агьмед Насиров пенсияйиз удучIвайизкьан гъилихну. 2005-2012-пи йисари дугъу образованиейин управлениейин начальникдин заместителди ва методистди ляхин гъапIну.
Хайлин йисари марцци зегьмет зигбаз лигну, йиз макьалайин игитриз «Дагъустан Республикайин лайикьлу мялим» (1997), «Урусатдин образованиейин гьюрматлу гъуллугъчи» (2005), «Зегьметнан ветеран» (2006) кIуру ччвурар тувну. Дугъаз гьацира Табасаран райондин главйири туву хайлин грамотйир, гьюрматнан кагъзар, хилихъ хъитIру сяътар а.
Аьгьмед Насировди неинки образованиейин цирк-лиъ, гьацира журналистикайиъра чан шил гъибтну. Табасаран райондиъ муниципальный «Табасарандин сес» газат ачмиш гъапIиган, думу 2001-2004-пи йисари газатдин кIулин редакторди гъилихну. 2004-пи йисан думу Урусатдин журналистарин жергйириз кьабул апIуру. Хъа 2012-пи йисан Аьгьмед Насиров Табасаран райондиъ Урусатдин сабвалин партияйин отделениейин кIулиъ дийигънийи.
2017-пи йисан, чан яш 70 йис гъабхьиган, Аьгьмед Насиров, аьрза тувну, пенсияйиз гъушнийи.
Аьгьмед Рамазановичди эдеблу хизан тикмиш апIбаъра хъуркьувалар улупну. Дугъу чан уьмрин юлдшихъди шубур ришна сар бай тербияламиш гъапIну, дурариз варидариз заан образование тувну, уьмриъ чпин йишв абгуз кюмек тувну. Аьгьмед Насиров чан 8 худлин ва 1 гудлин ккуни абара ву. Аба дурарин хъуркьувалариин рази ву, иллагьки Дагъустан Республикайин Главайин ва Правительствойин администрацияйиъ консультантди лихурайи Марат Рягьимовдиин.
Марцци, къанажагълу ва халкьдиз мянфяаьт кайи уьмур хъапIу Аьгьмед Рамазановичдиз ярхи уьмур ва жандин мюгькам сагъ’вал ккун апIурхьа.
