Ихь республикайиъ яшамиш шулайи баяр-шубар багъри чIаларихьан ярхла даришри кIури, Дагъустандин илимдин ва образованиейин Министерствойин пишекрарин тешкиллувалиинди, аьхиримжи вахтна жюрбежюр серенжемар, конкурсар кIули гъягъюра. Апрелин 18-пи йигъан Мягьячгъала шагьриъ «Бабан чIалнан варитIан ужуб кабинет» кIуру конкурсра кIули гъубшну. Дидиъ Дербент шагьрин 15-пи нумрайин мектебдиъ табасаран чIалнан дарсар киврайи Имара Юзбегова гъалиб гъахьну.
Дугъриданра, му мектебдиъ айи думукьан аьхю дару кабинетдиъ багъри чIал, халкьдин культура аьгъю апIуз ккунидар вари лазим вуйибдихъди тямин дапIна.
«Узухъди сабси му кабинетдиъ ихь чIалнан дарсар киври, Индира Велиевара лихура. Мектебдик цIа кабхъбан кьяляхъ диву цIийи дараматариъ ляхин гъабхури 5-пи йистIан даршра, ич ляхин ужуди кIули гъябгъбан бадали, вари лазим вуйи рякъбан пособйир, таблицйир, кабинетдиз деебту пулихъси, ич хусуси дакьатарихъра гъадагъунча. Кабинет, гъийин деврин тIалабариз дилигну, гьязур гъапIунча», – кIура ич сюгьбатнаъ Имара Гьяжикеримовнайи.
Аьхиримжи йисари вари бицIидари багъри чIалар аьгъю апIура. Имара Юзбеговайин гафариинди, бицIи классариъ урхурайидарин бабан чIалнахьна вуйи маракьлувал аьхюб ву. Аьхю классариъ айи баяр-шубари ОГЭ-йиз, ЕГЭ-йиз асас фикир тувуз хъюгъра ва дурариз имбу предметарихьна гьязур хьуз вахт гьубкIрадар.
«Узу сачра мициб конкурсдиъ иштирак гъахьнийза. Думуган 2-пи йишв гъадабгънийза. Ццийин урхбан йисан кабинетдиз хъана лазим вуйибра гьязур гъапIунча. Сач гъубшу конкурсдиъ узу кабинетдикан ктибтнийза. Ццийин йисан, баяр-шубарин теклифниинди, дурарра иштирак духьну, учу слайдар ва видео гьязур гъапIунча. Гьацира узу кидибтну ккуниб шиърариинди гьязур гъапIунза. Конкурсдиъ 30 мялим иштирак гъахьнийи. Конкурсдин иштиракчйириз «Кабинетдихъди гюрюшмиш хьпан карточка» ва кабинетдин видеоролик-экскурсия улупбариъ кьимат дивну. Ужудар кабинетар хъана айи, хъа презентация ужуди гьязур гъапIдар адайи», – давам гъапIну И.Гь.Юзбеговайи.
Му кабинетдин саб мурччв музейиз илтIибкIна. БицIи дуркьар, халкьдин кюгьне ккурттар, шинт ва дуланажагъдиъ ишлетмиш апIру шей`арра айи му классдин кабинетди баяр-шубарин ихь культура-йихьна вуйи маракьлувал артухъ апIура.
Мектебдиъ табасаран чIал киврайи Имара Юзбеговайи ва Индира Велиевайи, цIийи технологйир ишлетмиш апIури, табасаран чIалнан сесер дургъбан бадали, баяр-шубариз мультфильмарра улупура. БицIи классариъ гьар ученикдихьна тувру карточкйир ишлетмиш апIура ва жюрбежюр сягьн-йир дивра.
«Хизандиъ ихь чIал дарапIрудариз классариъ айи вахтна читинди алабхъуру. БицIидари, чIал аьгъдарчуз кIури, дарсариъ жанлуди иштирак’вал апIури шулдар. Дурарин маракьлувал артухъ апIбан бадали, бицIи классариъ тамши саягънан дарсар гьязур апIури шулза. Гьацира пишекарвал за апIру курсаризра гъушунза. Сач дурар Дербент шагьрин 18-пи мектебдиъ кIули гъушнийи. Узу Дербент райондин Мамедгъала поселокдиъ бабкан гъахьунзу. Дагъустандин университетдин биологияйин факультет ккудубкIунза. Йиз дипломдихъди вуйи ляхин адру вахтна, табасаран чIал кивуб теклиф гъапIнийзуз. Гьаддиз узу багъри чIал ахтармиш апIбаз, йиз пишекарвал за апIбаз гизаф фикир тувраза», – аьлава гъапIну йиз сюгьбатчийи.
Ав, багъри чIалнан аьламатнан вилаятдиъ пулихъ масу гъадабгъуз даршлу аьхю девлет а. Мектебдиъ урхурайи баяр-шубариз чаз айи аьгъювалар аьхю аьшкьниинди туврайи мялим Имара Юзбегова чан пише-йиин юкIв алир, бицIидар ккунир ву.
Думу учвра 4 веледдин баб ву. Имара Гьяжикеримовна конкурсдиъ гъалиб хьувалихъди тебрик апIури, дугъаз гележегдиъ хъана хъуркьувалар ккун апIурхьа!
