Гьаму йисан эвелариан мина гъийин йигъаз Дагъустандиъ кIамкIар уьзриан 154 кас аьзарлу гъахьну, дурарикан 80% аьзарлу гъахьидар жюрбежюр яшариъ айи бицIидар ву. Духтрари мялум апIурайиганси, му уьзур тарагъбан асас себеб – абйир-бабари чпин бицIидариз му уьзриз аькси прививка апIуз разивал тутруврайивал гъабхьну.
Гьаму йигъари «Дагъустан» РИА-йин конференцйир гъахру залиъ Дагъустандиъ кIамкIар уьзур тарабгъувалихъди аьлакьалу месэлйириз бахш дапIнайи конференция кIули гъубшну.
Конференцияйиъ РД-йин Минздравдин агьалйириз медицинайин кюмек тувру отделин начальник Муслимат Гьясанова ва республикайин Муфтиятдин вакил, ислам диндин медицинайин пишекар Мягьяммад Аьбдурягьманов иштирак гъахьну.
Муслимат Гьясановайи къайд гъапIганси, прививкйирин Милли календариин биналамиш духьну, кIамкIар уьзриан бицIириз вакцинайин сабпи руб думу бабкан духьну сад йис хьайиз йивну ккунду, хъа дугъан 6 йис гъабхьиган, му прививка текрар апIуб лазим ву. Гьацира жюрбежюр себебариан прививкайин му руб дириву, вая гъивнуш гьякьикьи мялуматар адру, яш 35 йис хьайиз кIамкIариан аьзарлу дархьи вари касари думу дивну ккунду.
КIамкIар уьзриз аькси прививка апIувал СПИД, онкологияйин уьзрар кайи ва аминогликозидарихьна (прививкайик кайи дармнар) аллергия айи ватанагьлийириз, гьямила дишагьлийириз ва гъагъи уьзрариан аьзарлу духьнайи касариз хай шулдар. Хъа Дагъустандиъ абйир-бабари чпин веледариз прививка апIуб диндиъ къадагъа дапIнайивал субут апIура.
Муфтиятдин вакил Мягьяммад Аьбдурягьмановди му суалназ кьатI’и жаваб тувну: «Сагъ’вал мюгькам апIувал Пайгъамбрин (с.аь.с.) сунна гьисаб шула. Инсанди, Аллагьу Тяаьлайи кюмек апIиди, кIурашра, думу гъавриъ ади ккнуду, Аллагьу Тяаьлайи чарасуз вуди кюмек апIиди, анжагъ ухьуз сагъ’вал мюгькам апIбан бадали арайиз духнайи дармнар ишлетмиш апIбан кьяляхъ. ДумутIанра гъайри, инсан аьзарлу духьну, учв сагъ апIуз чара дарабгди кечмиш гъахьиш, дугъхьан сагъ хьуз мумкинвал гьаз ишлетмиш гъапIундарш суал-жаваб гъадабгъиди».
М.Аьбдурягьмановди къайд гъапIганси, Ислам диндин къанунариинди, эгер чиркишнар ктарш, дармнар, вакцинйир ва жара итIру сурсатар сагъ’вал мюгькам апIбаъ ишлетмиш апIуз шулу.
