Гьаму йигъари РД-йин Глава Сергей Меликовди республикайин оперативный штабдихъди вуйи яркьу совещаниейиъ Дагъустандиъ коронавирусдин тIягъюн тарабгъувализ аькси вуди кьабул дапIнайи ижми къайдйир алдагъуваликан мялум гъапIну. Мартдин вазлин кьялариъ республикайин бицIидари тамашир апIру ва рягьятвал гъадабгъру клубарна сумчрарин ва жара аьхю мажлисар гъахру залар арццуз ихтияр тувну. Гьамус алвер апIру йишвариъ, гостиницйириъ, кинотеатрариъ ва санаторйириъ QR-код улулупди учIвуз шулу.
Му мялуматарихъди таниш хьпан кьяляхъ, узу Къизлар шагьриъ ерлешмиш дубхьнайи сумчрар гъахру аьхю дараматдин эйси, ихь ватанагьли Зирифат Аьгьмедовайихьна илтIикIнийза. Дугъан хизандин сумчрар гъахру «Жемчужина» зал, Къизлар шагьриъси, кIулди вари Къизлар райондиъ варитIан аьхюбси, цIийибси ва утканубси гьисаб дапIна.
«Ав, коронавирусдин инфекцияйин тIягъюн тарабгъбахъди аьлакьалу вуди, ихь уьлкейиъ аьхю ва бицIи бизнес гъабхурайи хайлин алверчйир гъагъи гьялнаъ ахьну. ИкибаштIан, сабпи нубатнаъди кьялан ва бицIи бизнес зяиф гъабхьну, гьадму гьисабнаан сумчрар ва жара шадлугънан аьхю серенжемар гъахру залар, бицIидари тамшир апIру клубар ва гьацира жара йишвар вахтназ вуди хъяркьували думу идарйирин эйсйириз зарар тувну. Ич залра кьюд йисан хъябкьну гъабхьнийи. Амма гьаму вахтнан арайиъ дидхъан тувру налогарин ва жара игьтияжариз вуйи пулар гьар вазлиъ туври гъахьунча. Узу анжагъ учкан улхурадарза. Варидариз читинвалар алахьну. Му саб тереф ву. Думу ижми уьлчмйир кьабул гъапIундайишра, коронавирусдин тIягъюн яркьуди тарабгъурайи вахтна, ич хизанди зал вахтназ вуди хъябкьбан гьякьнаан къарар адабгънийи. Фицики сифтена-сифте инсандин сагъ’валикан фикир дапIну ккунду. Хъа думу уьзур асас вуди гизаф инсанар уч шлу йишвариъ тарабгъувалин хатIа аьхюб вуйи.
Сабсана пуз ккундузуз, бализ швушв хуз вая риш швуваз хъауз йигъ дивну, сумчир апIру зал улихь ккимиди дибисну гъахьи аьдати инсанаризра хайлин читинвалар алахьну. Ижми къайдйир кьабул дапIну, учу зал хъябкьюз мажбур гъапIиган, хайлиндари, учкан гиран апIури, ич адресназ чпин наразивал улупури гъахьну. Варидариз гьяятдиъ, хулаъ сумчир апIуз сабсдар мумкинвалар адар, мидланра гъайри, хьадукран вая чвлин вазари чпин хуларин гьяятариъ сумчрар апIрудариз гьавйир чIур хьували, мархьари манигъ’вал апIури гъахьну. Гьаму кьюд йисандин арайиъ хайлин хизанариз гьамцдар гъагъи шараитариъ сумчрар апIувал кьисмат гъабхьну. Гьамус залар арццуз ихтияр тувна. Ич ляхниин иливнайи ижми къадагъйир сацIиб зяиф гъапIну. Бязи уьлчмйир гьеле кьувватнаъ ими. Залариъ дезинфекция апIувал, маскйир алахьувал ва жара тIалабар чарасуз вуди дюрхну ккунду. Узу дидихъди рази вуза. Му хабрариин, икибаштIан, учу рази гъахьунча. Мицдар гъагъи йигъар сарун ухьуз саризра кьисмат даришри», – гъапну ич сюгьбатнаъ Зирифат Аьгьмедовайи.
