Ухьуз варидариз рябкъюрайиганси, уьлкейиз читин вахтар дуфна. Сабпи читинвал – ихь гъунши уьлкейиъ, Советарин Союздин девриъ халкьар дугъри гъуншйирси, ужудар юлдшарси, чвйирси яшамиш шули гъахьи республикайин ругариин дявдин хусуси метлеб айи операция гъабхурайивал, думу операцияйиъ ихь жигьилар, гъунши уьлкйирин ислягь ватандашар, саламатвал дудубгну, уьмрихъ мягьрум шулайивал ву.
Урусатдин гьюкуматдиз аькси вуди, дюн’яйин аьхюну пай уьлкйири санкцйир мялум дапIна. Уьлкейин гизаф цирклариз, думу цирклариъ лихурайи агьалйириз санкцйири аьхю зарарар хура, инсанар ляхнихъ мягьрум духьна.
Урусатдин Правительствойи, Дагъустандиъ зегьметнан рынокдин тереф уьбхюри ва санкцйир илитIнайи вахтна бикарвал артухъ дархьбан бадали, республикайиз 399 миллион манат жара гъапIну. Дидин гьякьнаан вуйи табшуругъниин РФ-дин Правительствойин председатель Михаил Мишустинди къул гъизигну.
РФ-дин Правительствойи уьлкейин регионариз вари 40 миллиарддиина манат жара гъапIну. Пулин дакьатар Правительствойин резервдин фонднаан гъадагъну. Премьер-министри къайд гъапIганси, му, агьалйир ляхнихъди тямин апIбан бадали, кьабул апIурайи уьлчмйирин саб пайтIан дар.
«Инсанари арайиз дуфнайи аьгьвалатнахъди аьлакьалу читинвалариан кIул адабгъбан бадали, регионарихъди гъабхурайи ляхин давам апIидихьа»,-гъапну Михаил Мишустинди.
Регионариз хътапIурайи пулин дакьатарин аьхюну пай ляхниан адауз мумкин вуйи инсанариз вахтназ вуди ляхин тешкил апIру йишвариз, цIийи ляхин абгури зегьметнан биржайиъ регистрация дапIнайи инсанариз пулихъ апIру жямяаьтлугъ ляхнар тешкил апIбаз харж апIиди.
7 миллиардтIан артухъ пул, промышленностдин карханйириан ляхниан адау инсанариз аьлава образование тувну, цIийи пише улупбан бадали, регионарин программйир уьмриз кечирмиш апIбаз харж апIиди.
Пулин дакьатарин имбу пай коммерцияйин дару тешкилатариз агьалйириз цIийи аьгъювалар тувбан курсар гъахбан грантариз жара апIбанди ву.
Гьарсар инсандиз ужуди яшамиш хьуз ккунду, хъа варидарихьан сабси мублагъ уьмур тямин апIуз шулдар. Аьхиримжи вазли Урусатдиан машгьур, Урусатдиъ девлет ва ад гъазанмиш гъапIу варжариинди агьалйир харижи уьлкйириз удучIвну гъушну. Дицисдар касари чпиз ватан фици «ккундуш» улупну.
Уьмур – гагь аку ригъ али, гагьсана кIару амсар али йигъаз ухшар ву, гьарсар касдин уьмриъ ухди-кьанди читин вахтар шулу. Ихь уьлкейин уьмризра гьамусяаьт читин вахтар дуфна. Хъа ухьуз, халкьдиз, гьарсаб читинвалиан кIул адабгъуз аьгъяди ккунду. Гьарганси, гъийин девриъра, зегьметниин юкIв али касдиз ляхин бихъиди. Ухьуз гьаму читин вахтариан сагъ-саламатди кIул адабгъуз Аллагь кюмек ишри!
