2022-пи йисан, уьмуми образование тувру тешкилатар рас апIбан гьякьнаан федеральный программа уьмриз кечирмиш апIури, республикайин 40 муниципалитетдиъ 210 мектеб рас апIбанди ву. Му программайиз 4,2 млрд манат харж апIиди.
Дагъустандин Правительствойин председателин сарпи заместитель Манвел Мажонцди къайд гъапIганси, гьамусяаьт йикьрар йитIувал, конкурсдин гьяракатар гъахувал ва гьацира рас апIбан ляхнар улупнайи вахтна тамам апIувал варитIан важиблу ву.
Республикайин образованиейинна илимдин министерствойи туврайи мялуматариинди, программайиъ улупнайи серенжемар вахтниинди кIули гъахбан бадали, муниципалитетарин образованйирин администрацйирихъди сатIиди ляхин тешкил апIура.
Гъи варидарик гъалабулугъвал кипнайи асас месэла – тикилишчивалин материаларин кьиматар за духьнайивал ву. Конкурсар мялум апIурашра, ляхнар ккергъру вахтназ тикилишчивалин материаларин кьиматар дигиш хьуз мумкинвал айиган, му ляхнар тамам апIрударихъди йикьрар йитIузра читин шула.
РД-йин тикилишдин, архитектурайин ва ЖКХ-йин министр Артур Сулеймановдин гафариинди, йикьрарин кьимат 30 процентдиинди за дапIнайивалихъди сабси, тикилишдин материаларин кьиматарра за шули гъахьиш, правительствойи подрядчикарин къайдалувал уьбхюз диш дапIнайи цIийи уьлчмйир кьабул апIбанди ву.
Рас апIурайи гьарсаб мектебдик «Саб вуйи Урусат» партияйин депутатар китIну, дурари РД-йин образованиейин ва илимдин министерствойин вакиларихъди сатIиди деетнайи дакьатар улупнайи метлебариз харж апIураш, гюзчивал гъабхиди.
