«Табасарандин нурар» газатдин гьюрматлу юлдшар!
Гьаму йисан майдин вазлиъ ихь ккуни газатдин сабпи нумра чапдиан удубчIвхъан мина 90 йис тамам шула. Чан ужуб деврин вахтна газат гьарсаб табасаран хизандин аьхю дуст вуйи. Почтальонди газат хайиз, гьарсаб хизан фици дидиз ккилибгури гъахьнуш, аьхю наслин вакилариз лап ужуди аьгъя.
Аьхиримжи вазари ихь уьлкейиъ духьнайи пашман гьядисйирихъди аьлакьалу вуди, гизаф жигьилари Ватан бадали чпин гъуллугънан буржи тамам апIури, гьар йигъан дурарикан хажалатнан хабрар гъюрайи, ригъ алабхъру терефнан уьлкйири ва США-йи мялум дапIнайи санкцйири ихь гьюкуматдин яшайишдинна экономикайин артмиш’вализ илзигурайи вахтна, шадлугънан серенжемар гъахувал ухшар дар. Гьаддиз, газатдин юбилейин серенжемарин тешкиллувалин комитетдин теклифниинди, газатдин юбилейин мажлис кIули гъабхувал жара вахтназ гъибтуз йикьрар дапIна. Тахминан, думу сентябрин вазлиъ кIули гъабхидича.
«Табасарандин нурар» газат – радио, телевидение, интернет, социальный сетар адру вахтна уьлкейиъ, республикайиъ айи хабрарикан, яшайишдинна экономикайин, гъулан мяишатдин зегьметкешарин хъуркьуваларикан мялуматар тувру ихь вари халкьдин мялуматарин дакьат вуйи, гьаддиз дидин юбилейин серенжемариъ ихь вари ватанагьлийир иштирак духьну ккунду. Гьаддихъди аьлакьалу вуди, учу учвуз конкурс мялум апIурача, иштиракчйирин яшар улупурадарча, фицики дидиъ варидарихьан иштирак хьуз шулу. Конкурсдиъ гъалиб гъахьидариз Мягьячгъалайиъ кIули гъягъру газатдин юбилейин серенжемариз теклиф апIидича ва пешкеш тувдича.
Конкурсдиз ичв хилариинди гьязур гъапIу, «Табасарандин нурар» – 90 йис дибикIнайи сяняаьтариз ккилигурача. Иштирак хьуз ккуни касди: «Фицдар сяняаьтариз?» – кIури, суал тувуб мумкин ву. Табасаран миллетдин инсанарин хилар «гъизилиндар» ву, яратмиш’валин устадвал кайи касди конкурсдиз фициб сяняаьт гьязур апIуруш, чав фикир дапIну ккунду. Гъаврикк ккаъбан бадали, кIурача, табиаьтдин материал (гьюлин-нирин жвилли кIикIлар, гъумрак кайи чIвакIар, гьарарин гъеерццу кажар, тумар ва гь.ж), гьибар, рангнан телар, рангнан мурслар, кирбтин кьалар ишлетмиш апIури, ичв кIваз хуш вуйи сяняаьт гьязур дапIну, август вазлин 30-пи йигъаз газатдин редакцияйиз хъадапIай. Конкурсдин вари иштиракчйирин экспонатарин выставка (дурар гьязур гъапIдарин ччвурара кади) юбилейин серенжем гъабхру йишваъ дегьлиздикк кIули гъябгъиди.
