Гъубшу гьяфтайиъ «Табасарандин нурар» газатдин конференцйир гъахру залиъ Имам Шамилин ччвурнахъ хъайи вари халкьарин фонднан президент Аьлиасхаб Хархачаев газатдин редакцияйин журналистарихъди гюрюшмиш гъахьну. Пресс-конференцияйиъ Мягьячгъала шагьрин Жямяаьтлугъ палатайин комиссияйин председатель Ферезуллагь Къягьримановра иштирак гъахьнийи.
Культурайинна тарихнан общество «Имам Шамилин ччвурнахъ хъайи фонд» 1991-пи йисан тешкил гъапIуб ву. Думу жямяаьлугъ тешкилат Дагъустандиъ, Кавказдиъ, Урусатдиъ, вари дюн’яйиъ гъягъюрайи серенжемарин иштиракчи ву. Фонднан ляхниъ Дагъустандин вари миллетарин вакилар иштирак шула. Табасаран халкьдин терефнаан фонднаъ вакилвал апIурайир Дагъустандин Огни шагьрин депутатарин собраниейин председателин заместитель Мягьямед Гъафаров ву.
Аьлиасхаб Хархачаевди къайд гъапIганси, фондну культурайинна тарихнан гъаврикк ккаъбан ляхин гъабхура, Кавказдин дявдин себебар ахтармиш апIура, Дагъустандин аьдатар, чIалар уьрхбаз ди-къатлу фикир тувра. Фондну чан ляхин саб Дагъустандиъ ваъ, гьацира Калининграддиъ, Калугайиъ, Москвайиъ, Санкт-Петербургдиъ, Кафари Кавказдин вари республикйириъ гъабхура.
Гьамусяаьт Турцияйиъ яшамиш шулайи дагъустан эллугълийир Имам Шамилин юбилейиз ккилигура. Тюркери Шейх Шамилиз (Турцияйиъ дугъаз шейх кIура) апIурайи гьюрматниин мюгьтал шулу. Душваъ Имам Шамилин ччвурнахъ хъайи 5 парк а. Анкара шагьриъ 1 парк, Стамбул шагьриъ – 2 парк, Ялова шагьриъ – 2 парк а.
Гьаму йисан Кавказдин милли игит, Дагъустандин ва Чечендин имам ва дагълуйирин азадвал бадали гъуху женгарин регьбер Шамил бабкан духьну 225 йис тамам шула. Кавказдин агьалйириз думу ччвур гьякьлу, ватанпервервалин деврихъди аьлакьалу ву. Имам Шамил дагълу вилаятдин ва динагьлийирин кIулиъ гъахьи кас ву. Дугъу Дагъустандин, Кафари Кавказдин, Урусатдин политикайин ва диндин уьмриъ аьхю роль уйнамиш гъапIну. Гьаддиз ухьу Дагъустандин ва Чечендин Имамдин 225 йисандин юбилей лайикьлуди къайд дапIну ккунду», – гъапнийи Аьлиасхаб Хархачаевди.
Тарихнан аьлимарин фикриинди, Имам Шамилин ччвур вари жямяаьтлугъди сабси кьабул дапIнадар, гьаддиз ихь метлеб – учв ва чан Ватан аьсрариз адлу гъапIу халис дагълу касдин гьюрмат ва ччвур гележегдин наслариз уьбхювал ву.
