Дагъустан Республикайин сагъламвал уьбхбан гъуллугъчйирин профсоюзди 23-пи мартдиан 13-пи июндиз «Дагъустандин медицинайин архйир» ччвур тувнайи конкурс мялум дапIна. Гьаддин гьякьнаан му тешкилатдин пресс-гъуллугъну мялум гъапIну.
Дагъустандин медицинайин архйир – шубубтIан артухъ наслиъ медицинайин пишекрар айи саб хизандин вакилар вая багахьлуйир ву.
Медицинайин архйирин кIулиъ айирси хизандиъ яшнан варитIан аьхю вакил гьисаб апIуру. Гьаци вуйиган, улихьган ва гьамусяаьт республикайин сагъламвал уьбхбан тешкилатариъ ляхин апIурайи касарихьан конкурсдиъ иштирак’вал апIуз шулу.
Конкурс жюрбежюр номинацйириан кIули гъябгъиди: «Насларихьан насларихьна туври» (му номинацияйин гъалибчи вуди медицинайин варитIан аьхю арха гьисаб апIиди); «ВаритIан яшлу арха» (му номинацияйиъ гъалибчи вуди вари архйирин арайиъ зегьметнан варитIан аьхю стаж айидар гьисаб апIиди); «ВаритIан ужуди медицинайин пише ачмиш гъапIдар» (му номинацияйиъ гъалибчи вуди медицинайин пишейиъ варитIан заан хъуркьувалар гъазанмиш гъапIу, апIурайи ляхник лайикьлу пай кивбаз лигну, гьюкуматдин, ерли самоуправление-йин, жямяаьтлугъ ва жара пешкешариинди ва гьюрматнан ччвурариинди лишанлу гъапIу хизандин вакилар гьисаб апIиди).
Гьарсаб номинацияйиъ шубур гъалибчи хьиди (I, II, III йишвар).
Конкурсдин комиссияйин кIулиъ РФ-дин сагъламвал уьбхбан гъуллугъчйирин профсоюздин Дагъустан Республикайин тешкилатдин председатель Зумруд Бучаева тяйин дапIна. Гьацира дидиз РД-йин сагъламвал уьбхбан министр Татьяна Беляева, РД-йин Главайин теклифчи Людмила Авшалумова ва жарадар дахил шула.
Конкурсдин вари иштиракчйириз дипломар тувди, хъа гъалибчйириз – Гьюрматнан грамотйир ва кьиматлу пешкешар.
Конкурсдин гьякьнаан лазим вуйи вари мялуматар Дагъустандин сагъламвал уьбхбан гъуллугъчйирин проф-союздин сайтдиъ http://profzdrav05.ru, «Документар/Постановленйир» разделиъ гъадагъуз шулу.
