Хайлин уьлкйирин фикир Украинайиъ кIули гъягъюрайи чIуру гьядисйириина жалб дубхьну имиди, жюрбежюр гьюкуматариъ COVID-19 – «стелс-омикрон» (ВА.2) цIийи вирус яркьуди тарабгъуз хъюбгъну. «Стелс» – инглис чIалнаан таржума гъапIган, «дярябкъру» вая «аьмалдар» кIуру гаф ву.

Дугъриданра, му штамм тестарихьди ахтармиш апIуз шуладар, ва бицIи вахтнан арайиъ уьзур гизаф кьадар инсанарикна тарабгъура.

Сабпи ражари му штамм цци январь вазлиъ Швецияйиъ, Данияйиъ ва Норвегияйиъ ачмиш гъабхьнийи. Гъи му уьзриан Китайдиъ, Италияйиъ, США-йиъ, Германияйиъ гъагъи аьгьвалат арайиз дуфна.

Китайдин варитIан гизаф инсанар яшамиш шулайи Шанхай шагьур душв’ан сар касдихьанра я удучIвуз, я дина гъягъюз даршлуганси хъябкьна. Душваъ карантиндин ижми къайдйир тяйин дапIна. Сар касдизра чав яшамиш шулайи хул’ан удучIвуз ихтияр адар. Туканар ва аптекйир ичIи духьну, хъяркьна.

Урусатдиъ ва Дагъустандиъ му жюрейин штамм тарабгънадар. Хъа улихьна айи коронавирусдикан улхуруш, ихь республикайиъ вирус ачмиш гъабхьи сабпи йигълан гъябгъюрайи йисан 12-пи апрелиз дид’ан 92550 кас аьзарлу гъахьну. ПЦР-диагностикайиан РД-йин лабораторйириъ 4846951 касдин ахтармишар гъурхну.