Терроризм фу вуш, Дагъустандин гьарсаб хизандиз лап ужуди мялум ву, фицики дидин хаинвали зарар тутруву хизан республикайиъ гьичра адаршул. Терроризм – гизафси гьюкум бадали женгнаъ айи политикайин кьувватарин женг гъабхбан асас дакьатарикан саб ву.
Урусатдин Яракьлу кьувватари Украинайин аьтрафариин хусуси метлеб айи операция ккебгъхъан мина саки кьюб вазкьан вахт дубшна.
Украинайихъди сатIи вуйи сяргьятар айи регионари, Украинайин миллетчйирин терефнаан терактар апIбан мумкинвал айивалихъди аьлакьалу вуди, хатIасузвалин уьлчмйир кьабул апIуз хъюгъна. Апрелин 11-пи йигълан башламиш дапIну, 15 йигъандин арайиъ Крымдин кафари терефнаъ, Краснодарин крайдин Ейскдин ва Шербинский районариъ, Воронеждин областдин кьюб райондиъ, Курскдин ва Брянскдин областариъ террориствалин гьяракатар тамам апIбан хатIа айиваликан мялум дапIна. Террориствалин хатIалувализ шубуб дережа а: укIуб (хатIалувал), гъатхуб (заан хатIалувал) ва уьруб (лап читин аьгьвалат арайиз дуфнайивал). Мялум дапIнайи дережа «гъатхуб» ву. Ктуху аьтрафариин кьувватнан гъурулушарин ляхин ижми къайдайиз дубхна. Хусуси метлеб айи подразделенйир чпин улихь диву фуну месэлара тамам апIуз гьязурди дийигъна.
КIваина хурача, Украинайиъ хусуси метлеб айи операция гъабхуз хъюгъхъан мина Курскдин погранпунктариз яракьдиан йивбар апIбан шубуб дюшюш гьисабназ гъадагъна: 24-пи февралиъ Глушковский райондин Теткино гъулаъ, 5-пи апрелиъ Суджанский райондиъ ва 9-пи апрелиъ Глушковский райондин Елизаветовка кIуру гъулаъ. Урусатдин сяргьятар уьрхюрайи кьушмари, йивбар апIурайи йишвариз жавабнан цIа уьлюбхну, тахсиркрар терг гъапIну.
Думу уьлчме профилактика бадали апIурайиб ву. Областариъ айи аьгьвалат саламатуб ву, къанун уьбхру органари аьгьвалат гьаммишан чпин гюзчиваликк уьбхюра. Вушра, мугъаятвал лазим ву. Гьюкмин кIулиъ айидари, къанун уьбхру органарин вакилари агьалйирикан шак гъюру инсанарикан, транспортдин дакьатарикан, алатарикан дишлади къанун уьбхру органариз мялумат тувувал ккун апIура.
Къайд апIувал лазим вуки, гъи дюн’яйин яшайишдинна экономикайин артмиш’валин терефнаан улихь хьайи аьхюну пай уьлкйир Урусатдиз къаршуди дийигънайиган, террориствалин хатIалувал ихь вари уьлкейиз а. Гъи ихь арайиъра Президентдин къарарариин рази дарудар гизаф а, амма дурарихьан чпин фикрарикан ачухъди пуз шуладар. Гьаддиз гъи ухьу варидари мугъаятвал дюбхну ккунду.
Лап багарихьди табиаьтдин гьав-йир мани гъахьиган, республикайиз гъюру туристарин кьадар артухъ хьибди, фицики Урусатдин ватандашариз гизаф харижи уьлк-йириз рякъяр хъяркьна. Хъа ухьу хялар кьабул апIуз гьарган гьязур вухьа. Республикайиз гъюрайи туристарин арайиъра ужударра, харжидарра хьуз мумкин ву. ЧIуру кьастар айи инсанар гизаф а. Ихтиятвал уьбхяй, лазим дарди таниш’валар яркьу мапIанай.
