Гъябгъюрайи йисан 13-пи апрелиан 13-пи майдиз Дагъустандин гъулан мяишатдин ва ипIру-убхъру сурсатарин министерствойи бицIи мяишатар артмиш апIбаз субсидйир ва грантар тувбан конкурсдиз аьрзйир кьабул апIура. 

 

БицIи мяишатарин артмиш’вализ 5 прог-раммайиан грантар ва субсидйир тувра: «Агростартап» грант; «Агропрогресс» проек-таринна хизанарин фермервалин мяишатдин артмиш’вализ вуйи грант; гъулан мяишатдин кооперативарин материалинна техникайин бина артмиш апIуз вуйи грант; гъулан мяишатдин кооперативари гъябгъюрайи йисан гъапIу харжарин сабну пай кьяляхъ тувбаз вуйи субсидйир; гъулан мяишатдин фермерариз чпи гъапIу харжарин саб пай кьяляхъ тувбан ва кюмек апIбан бадали тувру субсидйир.

«Агростартап» грант тувбан натижайиъ думу грант гъадабгъдари официально вуди, яна вари мялуматар Урусатдин пенсйирин фондназ хъ-таъруганси, цIийи лихру йишвар ачмиш дапIну, инсанар ляхнихъди тямин апIувал чарасуз лазим ву.

«Агростартап» грант, асас вуди гъулан мяишатдин сурсатарихъди алверчивал апIурайидариз вая гьадму ляхниин машгъул духьнайидариз туврайиб ву. Программайин конкурсдиъ иштирак хьуз, тазади КФХ ккебгърайидаризси, кIул’инди вуйи хусуси мяишатаризра (ЛПХ) ихтияр а. Амма, эгер ЛПХ-йи грант гъадабгъиш, думу чарасуз вуди КФХ-йиз илтIибкIну, регистрация дапIну ккунду. Конкурсдин натижйир йивбан кьяляхъ гъалиб шулайир фермер вуш, дугъаз 2-3 миллион манатдин грант тувди, хъа кооператив иштирак дубхьну, гъалиб гъабхьиш, думуган тувру грантин кьадар 4 миллион манат хьибди.

Конкурсдиъ иштирак хьбан бадали аьрза тувруган, аьрзайихъди вари халис документарра хъади ккунду. Хъа фицдар документар ккундуш, гъулан мяишатдин ва ипIру-убхъру сурсатарин министерствойин сайтдиъ лигай.