Табасаран райондиан «150 мектеб» проектдиъ иштирак шулайи сабсана мектебдиз кюмек апIру кас арайиз удучIвну. Магьан Къужниккарин кьялан мектебдиъ расвалин ляхнар тамам апIуб дилаварчи Шагьсин Мирзоев чаина гъадабгъну.

Учв Шагьсин Мирзоев Дагъустандин Огни шагьриъ яшамиш шулайир, гьадушваъ мектеб ккудубкIур вушра, багъри гъулан мектебдиз кюмек ккундайиваликан аьгъю гъабхьиган, дугъу дишлади чан терефнаан 500 агъзур манатдин кюмек апIуз Табасаран райондин кIули айи Мягьямед Къурбановдиз ва РД-йин экономикайинна аьтрафарин артмиш’валин Министерствойиз заминвал апIбан кIажар хътаъну.

«Сач гьюкуматдинна хусуси дакьатариинди сатIиди ляхин апIбан «100 мектеб» проектдикан гъеебхьиган, му проект кIулиз адабгъуз хайлин касари кюмек тувур кIури, фикир гъапIнийза. Думу проект ццира давам шула. Амма, му ражари «100 мектебдикан» «150 мектеб» гъапIну. Чпихьан удукьру гьарсар касди мушваъ иштирак’вал гъапIишра, зарар адар. Узу йиз нумунайиинди му ляхнихьна имбунударра жалб апIуз ккундузуз».

Къайд апIуз ккундузузки, му кас чан халкьдихьан гьич саб вахтнара ярхла шуладар. Ццийин эвалариъ ич газатдин подпискайин кампания гъябгъюрайи вахтна, дугъу чан терефнаан подписка апIбаз хайлин кюмек тувну.