Мялум вуйиганси, Февралин 24-пи йигълан башламиш дапIну, Урусатдин Яракьлу кьувватарин эскрари Украинайин аьтрафариин ислягь халкьар нацистарихьан азад апIбан хусуси метлеб айи дявдин операция кIули гъабхура. Улупнайи гьяракатариъ ихь халкьдин вакиларира чпин улихь дивнайи вазифйир намуслувалиинди тамам апIура, ва дурарикан хайлиндар гьюкуматдин дережайин жюрбежюр гьюрматнан ччвурариз лайикь духьна.
Ихь ватанагьли, генерал-майор Эседуллагь Абачев, дугъан багахьлуйири субут апIурайиганси, улупнайи хусуси метлебнан операцияйиъ саки сифте йигъариланмина иштирак шула.
Луганскдин ва Донецк-дин Халкьдин Республикйирин ислягь ватандашар нацистарихьанна Бандерайин терефкрарихьан азад апIбан гьяракатариъ дугъан регьберваликкди ихь эскрари натижалу ляхин гъубхну.
Дявдин гьяракатар заан дережайиъди тамам апIбаз лигну, Эседуллагь Абачевдиз «Луганск Республикайин ИГИТ» кIуру ччвур тувну. Тялукь къарариин ЛНР-рин кIулиъ айи Леонид Пасечникди апрелин 20-пи йигъан къул гъизигну.
Ихь дирбаш ватанагьли му хъуркьуваларихъди марцци кIваан тебрик апIури, «Табасарандин нурар» газатдин редакцияйин коллективдин терефнаан, дугъаз Ватандин маракьар уьрхбан гъуллугънаъ мюгькам сагъ’вал, ужуб далу ва уьлкейиъ ислягьвал хьувал ккун апIурача!
Эседуллагь Аьбдул-муъминович Абачев 1968-пи йисан Хив райондин Зилдикк гъулаъ аьдати зегьметкеш хизандиъ бабкан гъахьну. 1983-пи йисан багъри гъулан бегьем дару уьмуми аьгъювалар тувбан мектеб ккудубкIну, дугъу урхбан рякъ гъунши Мажвгул гъулан мектебдиъ давам гъапIну. Асас аьгъювалар гъадагъбан кьяляхъ, Эседуллагь Абачев 1985-пи йисан Харьков шагьрин танкарин командйирин гвардияйин заан училищейик урхуз кучIвну. 1989-пи йисан улупнайи училище заан аьгъювалариинди ккудубкIну, думу Ватандиз вафалувалиинди гъуллугъ апIуз хъюгъру. 2002-пи йисан дугъу гьацира Урусатдин Яракьлу кьувватарин уьму- ми кьушмарин академияра ккудубкIну. РФ-дин Яракьлу кьувватарин дахилнаъди Ватандин азадвал, ислягьвал ва сабвал уьрхбан бадали, дугъу жюрбежюр жавабдар гъуллугъариъ баркаллу зегьмет гъизигну.
Эседуллагь Абачевдиз дявдин гъуллугънан рякъюъ Кафари Кавказдиъ, Кьибла Осетияйиъ, Азербайжандинна Арменияйин арайиъ гъахьи гъалмагълариъ ва хайлин жара заан метлеб айи дявдин гьяракатариъ иштирак хьувал алабхъну. Хъа гьамусяаьт дугъу Украинайин ругариин гъабхурайи СВО-йиъ Урусатдин оборонайин министерствойи чпин улихь дивнайи вазифйир намуслувалиинди тамам апIуз зегьмет зигура.
Чан гъардшин ватанпервервалин кьувватнакан Эседуллагь Абачевдин чуччу дамагълуди ктибтура.
«Инсандиз уьмриъ, шаксуз, чан хусуси метлеб хьувал чарасуз лазим ву. Улихь кьатI’и месэлйир дивган, жвуван кIваъ айи ниятар бегьем апIбан фикриккди тамам апIуз хъюгъю ляхнариъ хъуркьувалихьна рукьуз рягьятди алабхъуру. Учуз, гъардшаризра, чйиризра, байвахтнахъанмина зегьметнахьна жалб апIури, хасиятнан ижмивал асас вуди ич рягьматлу адашди тувунчуз. Дадайира адашдин теклифарин тереф уьбхюри шуйи.
Уьмрин къайдйирикан улхури, учуз абйир-бабари фициб дюшюшдиъра ватанпервервал, рюгьнан кьувват уьбхбан чарасузваликан кIури шуйи.
Гъи учкан гьарсар, аьхю духьну, хизандин эйсйир духьна. Уьмриъ ужубра-харжибра, шадвалра-пашманвалра тархьну гъюри аьдат ву.
Эседуллагь учкан варидарикан гьацира хасиятнан ижмир вуйи, хъа уьмрин метлебди дявдин гъуллугъ ктабгъу думу чан рякъюъ алахьу читинвалари имбубсан лигим гъапIну.
Гъи уьлкейин аьгьвалат фикриз гъадабгъиган, шаксуз, учуз фикирра, дердра качуз. Хъа гьадму саб вахтна гъардшин зегьметну жвуван Ватандиз, аьдати халкьдин гележегдиз ислягьвал ва мясляаьт туврувалин гъавриъ айивали учук дамагъра капIра. Читинвалариан намуслувалиинди удучIвну, багахь вахтна гъалибвалихъна гъюрувалик умуд кивурхьа», – гъапну дугъу.
Дугъриданра, уьлкейиъ гъягъюрайи гьяракатар фикриз гъадагъну, гъи артмиш шулайи наслар ватанпервервалин гьиссариккди тербияламиш апIбан важиблувал аьхюб ву.
Гъит ихь ватанпервер насларин жергйир хъанара яркьу ишри! Гъит Урусатдиъ укIу завари ва бицIидарин аьлхъбан шаду сесери агъавал апIри!
