2022-пи йисан 16-пи майдиан 18-пи майдиз Табасаран райондин Хючна гъулаъ айи сабпи нумрайин лицейдиъ райондин культурайин управлениейи образованиейин управлениейихъди сатIиди, мектебариъ урхурайи бицIидарин арайиъ зигьимлу баяр-шубар агбан бадали, «Бажаранвал кайи цIийи касар» ччвур тувнайи конкурс кIули гъубхну.

 

 

Конкурсдиъ иштирак шулайидар, яшназ лигну, кьюб дестейиз пай дапIнайи: 1-пи дестейик 7 йислан 15 йис’ина яшнаъ айи баяр-шубар, хъа 2-пи дестейик – 16 йислан 25 йис’ина яш дубхьнайи живанар кахьрайи. Музыкайин нумрар шубуб номинацияйикан ибарат вуйи: 1-пи номинация – музыкайин алатдиин мукьам йивувал; 2-пи номинация – мяъли апIувал; 3-пи номинация – ялхъван апIувал. Гьарсаб номинацияйиъ 1-2-3-пи йишвар гъадагъдариз тялукь дипломар, грамотйир ва кьиматлу пешкешар тувди. Майдин вазлиъ конкурсдин финалра кIули гъябгъиди.

Му серенжемдиъ 30-рихьна коллективар иштирак гъахьнийи. Тамашичйириз варитIан кьабул АхьитI ва Кюрягъ гъуларин культурайин хулари дивнайи «Ургур чвена сар чи» ва «Табасарандин дагълу шубар» кIуру ялхъвнар кьабул гъахьнийи. Музыкайин алатариин уйнамиш апIру жигьилар Гелинбатан ва Дарвагъ гъулариан вуйи. Мяълийир апIбан номинацияйиъ ТIюрягъ, ГьепIил, ТIаттил, ТинитI ва гьацира жара гъулариан вуйи мяълийирин устадар иштирак гъахьнийи.
Газатдин гъюру нумрайиъ конкурсдикан яркьуди мялуматар тувдича.