РФ-дин сагъламвал уьбхру министр Михаил Мурашкойи гьаму йигъари Калугайиъ гъабхьи пресс-конференцияйиъ къайд гъапIганси, Урусатдиъ коронавирусдин тIягъвнин хатIалувал гьелелиг яваш дубхьнадар.
«Урусатдиъ COVID-19 уьзриан аьзарлу шулайидарин кьадар гьеле аьхюб вуди гъубзра. ТIягъюн бегьемди терг апIуз шуладар. Гъийин йигъаз больницйириъ коронавирусдиан аьзарлу духьнайи 100 агъзурихьнакьан инсанар а, дурарикан 2,5 агъзур кас гъагъи гьялнаъди иццура», – гъапнийи министри.
Дугъан гафариинди, дюн’яйин вари уьлкйирин улупбар гъадагъиш, улихьна йисарихь тевиган, коронавирусдин тIягъюн хайлин кьяляхъ гъивну.
«Хъа, гьаци вушра, ухьуз рябгъюрайиганси, дюн’яйин тмуну кIулихъ хъайи бязи харижи уьлкйириъ коронавирусдиан аьзарлу хьувалин улупбар заандар вуди гъузра. Гьаддиз, икибаштIан, уьзриз «цIийи лепйирихьна» гьязурди гъузну ккунду», – къайд гъапIнийи Михаил Мурашкойи.
Министри тасдикь гъапIганси, гъийин йигъан коронавирусдин уьзриз аькси профилактика – вакцинация гъабхувал ву. Думу прививка гьар гьацI йисак дапIну ккунду.
Аьхиримжи улупбарикан улхуруш, 6-пи июндиъ Урусатдиъ коронавирусдиан 3349 кас аьзарлу гъахьну, 64 кас гъийихну. Уьзриан сагъ духьну 3492 кас хулариз деетну.
Урусатдин 18 региондиъ му хатIалу уьзриан аьзарлу шулайидарин кьадар гьелелиг заануб вуди гъубзра, хъа 49 региондиъ коронавирусдиан аьзарлу хьпан улупбар ис гъахьну.
Роспотребнадзорин РД-йиъ айи управлениейин улупбариинди, 2022-пи йисан июндин вазлин ккудушу 6 йигъан Дагъустан Республикайиъ коронавирусдиан 27 кас аьзарлу гъахьну. Республикайиъ вирус ачмиш гъабхьи сабпи йигъхъан мина гъийин йигъаз дид’ан 93 303 кас аьзарлу гъахьну. РД-йиъ ПЦР-диагностика гъабхру лабораторйириъ 5 163 597 ахтармишар гъурхну.
Роспотребнадзорин РД-йиъ айи управлениейин кIулиъ айидари республикайин ватандашарикан, хъа асас вуди яшлу касарикан ва сагъ апIуз даршлу уьзрар кайидарикан, гизаф инсанар уч шлу йишварихьан ярхлади гъузувал, марццишан уьбхювал, жандин гьавйир гъагъи гъахьиш, вахтниинди духтрарихьна илтIикIувал ккун апIура.
Мидланра гъайри, июндин 7-пи йигъан РД-йин глава Сергей Меликовди Дагъустандиъ инсанар гизаф уч шлу йишвариъ чрасуз вуди медицинайин маска алабхьну гъитбан тIалабар алдагъну.
Дугъу къайд гъапIганси, ижми уьлчмйир алдагъували гъийин шартIариъ чарасуз лазим вуйи бизнес кьувватлу хьуз гъитди.
Республикайиъ коронавирусдиз аьксиди кьабул дапIнайи уьлчмйирикан гъийин йигъан чарасуз вуди гъубзрайиб вакцинация ву. Хъа думу, зиихъ къайд дапIнайиганси, гьар гьацI йисак дапIну ккунду.
