Ухьуз аьгъюганси, аьхиримжи йисари ихь жигьил спортсменари чпин хъуркьувалариинди ухьу гизаф рази апIура. Улихьна вахтариси дарди, аьхиримжи йисари ихь халкьдин вакилари спортдин жюрбежюр жюрйириан заан хъуркьувалар гъазанмиш апIбан дюшюшар йигълан – йигъаз артухъ шула. Халкьдиз чан кIубан, бажаругълу баярикан, дурари улупурайи гьунарарикан аьгъяди ккунду, гьаз гъапиш жвуван ватанагьли урхбаъ, ляхниъ, спортдиъ вушра улихь гъягъруган, кIваз шадвалин, утканвалин гьиссар гъюру. Дугъу гъазанмиш гъапIу хъуркьуваларик жвуван пайра кайиганси гьебгъру.
Нубатнан ражну мицисдар шадвалин, утканвалин гьиссар уягъ гъапIдар Табасаран райондин «Олимп» кIуру спорт клуб ва 4-пи нумрайин жигьиларинна бицIидарин спортдин мектеб ву.
15-пи июндиъ Дербент шагьриъ айи 6-пи нумрайин жигьиларинна бицIидарин спортдин мектебдиъ Кафари Дагъустандин 2007-2013-пи йисари бабкан гъахьи спортсменарин арайиъ юкьяр дисбаан ачухъ турнир кIули гъубшну.
Му турнир, Дагъустандин шагьраринна гъуларин спортсменарин арайиъ дуствална мясляаьт хьпан, спортсменари юкьяр дисбаан чиб-чпихъан артухъси аьгъювалар гъадагъну, спортдин му жюрейин ад за апIбан бадали, тешкил гъапIуб вуйи.
Табасаран райондиан думу турнириъ «Олимп» кIуру спортдин клубдиъ ва 4-пи нумрайин жигьиларинна бицIидарин спортдин мектебдиъ юкьяр дисбан спортдиан аьгъювалар гъадагъу-райи жигьил спортсменар иштирак гъахьнийи. Спортсменар талитарихьна ужуди гьязур гъапIу тренерар ТIагьир Нуров ва Мурад Аьзизов вуйи.
КIули гъушу талитарин натижйириинди Табасаран райондин командайи сабпи йишв гъибисну. Думу турнириъ Табасаран райондиан 25 спортсмен иштирак гъахьну. Дурари 8 — сабпи йишвар, 4 — кьюбпи йишвар, 9 — шубубпи йишвар гъадагъну.
ТIагьир Нуровди гьязур гъапIу спортсменарикан талитариъ сабпи йишвар: Р. Аьбдуллаевди (38 кг), М. Мягьямедовди (54 кг), Р. Уьмаровди (27 кг), И. Шиховди (27 кг); кьюбпи йишвар: Д. Сулеймановди (27 кг), Р. Исмяиловди (51 кг), К. Шихмягьямедовди (25 кг); шубубпи йишвар: Н. Сулеймановди (29 кг), К. Ражабовди (31 кг), Т. Дадашевди (49 кг), Н. Дадашевди (31 кг), А. Аслановди (61 кг), М. Мягьямедселимовди (46 кг), Э. Муслимовди (32 кг) гъадагъну.
Мурад Аьзизовди гьязур гъапIу спортсменарикан талитариъ сабпи йишвар: М. Муслимовди (23 кг), М. Сулеймановди (33 кг), Э. Мягьямедовди (35 кг), М. Фейзуллаевди (46 кг); кьюбпи йишв – И. Аьлиевди (61 кг); шубубпи йишвар: К. Кьасумовди (61 кг), О. Аьлиевди (29 кг) гъадагъну.
Талитариъ гъалиб гъахьидар вари кубкйириинди, дипломариинди ва медалариинди лишанлу гъапIну.
Талитарин кIулин судья Г. Э. Гьяжиев, секретарь Ш. М. Мягьямедов вуйи.
Ихь жигьил спортсменар му гъалибвалихъди мубарак апIури, гележегдиъ дурариз хъана заан хъуркьувалар хьуб ккун апIурхьа.
