«Гьарсар гагайизна дадайиз чпин веледар жвуван хизандиз, гъуни-гъуншйириз, багахьлуйириз ва багъри халкьдиз хайирлудар духьну ккунивал аьгъяхьуз, амма, гьяйифки, варидарихьан саб дережайиъди гьаму жилиин ужувлан шил гъибтуз шулдар», – гьамцдар гафариинди ккебгъра шаир Пирмягьямед Кьасумовдин улихьна йигъари чапдиан удубчIву, «Ужувлан шил» ччвур тувнайи цIийи китаб.
Йиз хизандин кIул вуди гъахьи думу касдикан ва дугъан яратмиш’валикан тярифар апIури узу бикIувал, гьелбетда, дурус дар, гьаддиз думу вазифа китаб урхрударин ихтиярназ тувну, жикъиди китабдикан мялумат тувуз ккундузуз.
Дюзди гъапиш, китаб шаири чан 75 йисандин юбилейиз чапдиан адабгъуз кIури гьязур апIурайиб вуйи, амма хабарсузди ачмиш гъабхьи чIуру уьзри думу хиялар кIулиз адагъуз гъитундайи. Му гьякьикьатдикан хабар ади, китаб гагайин 80 йисандин юбилейиз бахш вуди чапдиан адабгъуз ният гъапIнийза. Ва магьа, цIиб кьанди вушра, шаирин зегьмет ва ирс чан урхрударихьна гъурубкьну.
Прозайин му китабдиъ дугъу чан хьуцIур йисандин журналиствалин ва писателвалин уьмриъ раст гъахьи йицIбариинди ужудар ва, неинки Дагъустандиз, хъа гьацира вари Урусатдизра кмиди адлу гъахьи касарикан гъидикIу ихтилатар ва очеркар тувна. «Гьацдар баркаллу касар себеб вуди, ихь абйир-бабари швнуб-саб аьсир мидиз улихьна ахьу дуствалин гьялкьйир гьамусдиз мюгькамди гъузна», – бикIура шаири.
Дурарикан вуди ихь халкьдин дирбаш бай Таригъули Юзбеговдикан, Гурхъарин Гьяжи-Юсуф Зияудиндикан, Ватандин Аьхю дявдин жанлу иштиракчи ва 17 веледдин аба Аьбдулязиз Гьяжиевдикан, чан женгнан юлдшарихъди сатIиди Рейхстагдин сабнуб кIакIниин Гъалибвалин Пайдагъ дубсу Урусатдин Игит Аьбдулгьяким Исмяиловдикан, Чечендиъ боевикарихъди гъахьи женгариъ дирбаш’вал улупу, «Женгнан лайикьлувалариз лигну» кIуру орден ва Кьягьялвалин кьюб орден айи жигьил генерал Рустам Мурадовдикан (китаб бикIруган ади гъахьи заан наградйир улупна) ва хъана жара адлу хизанарин вакиларикан макьалйир, дустарикан багьалу кIваин апIбар, набалугъариз вуйи ва сатирайин ихтилатар китабдиъ атIагна.
Автори дугъриди тасдикь апIурайиси, ужувлан шил деврарихьан ктIубшвуз шлуб дар. Учвра вари уьмриъ дидин терефкар вуди гъахьи шаириз дицдар касарихъди вуйи гюрюшар лапра хушлудар вуди гъахьиб ва гьаддиз думу макьалйириз цIийи китабдиъ йишв гъибихъуб ачухъ шула.
«Сифте гаф» ккудубкIури, шаирира бикIурайиси, гъит ухьу гьарсар гьаму жилиин ужувлан шил гъибтру агьларикан ишри!
