Июндин 22-пи йигъан ихь улкейин вари аьтрафариин, 1941-пи йисан Ватандин Аьхю дяви ккебгъу пашманвалин йигъ къайд апIури, жюрбежюр серенжемар кIули гъушну.
Гьюрмат уьбхбан ва пашманвалин Йигъахъди аьлакьалу вуди, Дагъустандин Глава Сергей Меликов дагъус-танлуйирихьна илтIикIну.

 

«Гьюрматлу дагъустанлуйир! Гьюрматлу ветеранар! 81 йис улихьна Ватандин Аьхю дяви ккебгъу июндин 22-пи йигъ ихь уьлкейиъ гьар йисан гьюрмат уьбхбан ва пашманвалин Йигъси къайд апIуру. «Дявдин ккебгъу сабпи пашман йигъ а…» – гъибикIну ихь машгьур ватангьли Расул Гьямзатовди. Думуган швнуб-саб наслин кьисматназ чIуру тясир гъапIу аьхю бала гьарсаб хулаз, гьарсаб хизандиз гъафнийи. Гьаддихъди сабси думу йигъ дюн’яйиз ихь халкьдин фашизмдихъди вуйи гъизгъин женгнаъ инсандин рюгьнан мюгькамвалин, кьягьялвалин, Ватандиз вафалувалин чешне улупу, Ватандин Аьхю дявдин игит тарих ккебгъу йигъра гъабхьну.
Гизаф йисар гъушнушра, дявдин думу гъагъи йисарикан вуйи фикир, сагъ даршлу зиянси, инсанарин кIваъ гъубзна. Думу вахт ярхла хьпахъ, Ватан гъюбхдариз гьюрмат апIбан, дурарин улихь ухьу буржлу вуйивалин гьиссар хъана гужал шула.
Гъи ухьу, ккудубшу уьмринси, гьамусдин деврин аьгьвалатнанра гъавриъ духьну ккунду. Гьюрмат уьбхбан ва пашманвалин Йигъу, тарихнан гъагъи дарсарикан кIваин апIру мукьмиси, ихь Ватандиина хил за апIуз саринра фикиркьан даршлуганси, мугъаятвалихъна дих апIура.
Гъалибвал гъадабгъу эскрарин машгьур аьдатар уьрхюри, эскервалин дирбаш’валин чешне улупури, гъи Урусатдиъ дявдин гъуллугънаъ айидари, ихь Ватандин хатIасузвал тямин апIури, чпин улихь дивнайи месэлйир тамам апIура. Сабпи жергйириъ, варитIан жавабдар терефариъ дагъустанлуйир а.
Ватан уьбхидихьа, аьхю Урусатдин кьудрат мюгькам апIури, республикайин артмиш’валиин, аргъаж шулайи нас-лариз уьлкейин ватанпервервалин аьдатар уьрхру тербия тувбиин ляхин гъабхидихьа!
Гьаму читин йигъари ихь ветеранариз, далу терефнаъ зегьмет гъизигдариз, дявдин вахтнан бицIидариз икрам апIураза. Гъийиху игитарин гьарган гьюрмат уьбхидихьа!» – гъапну Сергей Меликовди.