Гьаму йигъари Мягьячгъалайиъ ва Урусатдин 9-сан шагьриъ Жигьиларин йигъ къайд апIбахъди аьлакьалу яркьу серенжемар ва фестивалар кIули гъушну. Дагъустандин меркездиъ тешкил гъапIу шадлугънан серенжемариъ 15 агъзуртIан артухъ жигьилар иштирак гъахьну.

 

 

Серенжемар гвачIнин ухди пляждин волейболин чемпионат ва Республика-йин веломарафон гъахбалан ккергъну. Жигьиларин йигъан Мягьячгъала шагьрин СтIал-Сулеймандин ччвурнахъ хъайи бульвариъ жюрбежюр темйирин 7 майдан ачмиш гъапIну. Дурар «Музыкайин майдан», «Креативдин ва юморин майдан», «Аьгъюваларин майдан», «Мумкинваларин майдан», «Уж’вал апIбан ва дуствалин майдан», «Гъуллугънаъ улихьна гъягъбан майдан» ва «Гьевеслуди уьмур хъапIрударин майдан» вуйи.

Гьаци фестивалин иштиракчйириз Жигьиларин йигъахъди аьлакьалу вуди республикайин серенжемариз хяларди дуфнайи федеральный спикерарихъди сюгьбатар гъахуз, грантарин программйирикан, креативдин индустрияйикан, гьевес-карвалин жягьтлу ляхнарикан ва гьацира чпиз маракьлу вуйи жара терефариан артухъ аьгъювалар гъадагъуз мумкинвалар гъахьну. Мидланра гъайри, майднариин интеллектуальный квизар, спортдин талитар, жюрбежюр цирклариан мастер-классар, лихру йишварин ярмаркйир, ораторвалин устадвалиан тренингар гъурхну. Гьацира фестивализ Республикайин ифи адабгъру ва тартиб апIру станцияйин дестера дуфнайи. Жвуван хушниинди ифи тувуз гъафи жигьиларин кьадарра аьхюб гъабхьну. Мидланра гъайри, жюрбежюр зирзибил уч апIбак, республикайин библиотекйирин фонд цIийи алапIбак, ДНР-иан ва ЛНР-иан вуйи бицIидариз уюнжагъар уч апIбак пай киву жигьиларра гизаф айи.
Жигьиларин фестивалин серенжемар концерт улупбиинди ккудукIну.