2022-пи йисан июндин 30-пи йигъан Мягьячгъалайиъ Дагъустан Республикайин ургубпи дих апIбан Халкьдин Собраниейин 13-пи сессия кIули гъубшну. Сессияйиъ гьял апIбан бадали, гизаф месэлйир адагънайи. Къанундин саб гъварч проектар сабпи урхбаъди кьабул гъапIну. Дурарин арайиъ «Дагъустан Республикайин Конституцияйиъ дигиш’валар тIаъбан гьякьнаан» къанундин проектди асас йишв бисурайи.
Къанундин му проект Прези-диумдиз адабгъруган, РД-йин юстицияйин министр Ханлар Пашабеговди къайд гъапIганси, республикайин асас къанундиъ дигиш’валар тIаувал РФ-дин Конституцияйиъ тIаърайи дигиш’валарихъди аьлакьалу ву.
Дагъустандин Глава Сергей Меликовдин тешкиллувалиинди республикайин Халкьдин Собраниейиз РД-йин Конституцияйиъ дигиш’валар тIаъбан гьякьнаан къанундин проект адабгъну. Дидин гьякьнаан гьюкмин кIулиъ айидари чпин фикрар ачухъ гъапIну.
РД-йин Халкьдин Собраниейиъ айи республикайин Главайин вакил Нюсрет Уьмаровди гъапиганси, РД-йин Халкьдин Собраниейиз региондин Главайи адагънайи месэлйир Дагъустандин асас документ РФ-дин Конституцияйихъди ва Федеральный къанундихъди дюзди гъюбан бадали лазим ву. «Саб гафниинди, 2020-пи йисан РФ-дин Конституцияйиъ кьабул дапIнайи дигиш’валариз лигну, ихь Конституцияйиъра, РФ-дин Конституцияйихъди дюзди гъюруганси дигиш’валар тIаъну ккунду. СМИ-йин арайиъ «сяргьятар, айиганси, дигиш дарапIди гъитувал» кIуру гафну гизаф улхбар арайиз духна. КIваин апIурхьа, РФ-дин Конституцияйин 67-пи маддайиз асас вуди, субъектарин сяргьятар кьюбиб терефарин разивал адарди дигиш апIуз хай шулдар. Яна Дагъустандин сяргьятар республикайин разивал адарди дигиш апIидар. РД-йин Конституцияйин 68-пи маддайин 2-пи пунктнаъ Дагъустан Республикайин сяргьятар дигиш апIбан йикьрар йитIувал РД-йин Халкьдин Собраниейин ихтиярназ тувнайивал тасдикь дапIна.
Мидланра савайи, гьадму маддайин 2.1 пунктназ асас вуди, аьтрафарин битаввал ва суверенитет Урусатдин Федерацияйи тямин апIура. Гьацира ихь Конституцияйиъ айи 57-пи маддайин пункт «Дагъустан Республикайин аьт-раф саб ву, Дагъустан Республикайин гизаф миллетарикан ибарат вуйи халкьдин разивал адарди, сяргьятар дигиш апIуз хай шулдар» дигиш дарапIди гъибтра.
Ухьуз ачухъди рябкъюрайиганси, тIаърайи дигиш’валари республикайин сяргьятарин зарар туврадар.
Гьаму месэла сабпи урхбаъди кьабул апIбан кьяляхъ, думу жямяаьтлугъ тешкилатарин, илимдин вакиларин арайиъ гьял апIиди. Къанундин проект кьюбпи урхбаъди кьабул апIайиз, думу жямяаьтлугъдин арайиъ гьял апIувал шубуб вазтIан цIиб дарди давам хьибди», – гъапну Нюсрет Уьмаровди.
