16-пи июлиъ Дербентдиъ, Низами Гянжевийин ччвурнахъ хъайи паркдиъ, жюрбежюр рангарин аквнахъди, мукьамра хъади, успагьи накьишар зигури завун аьршдиз шид гатIабхьру Урусатдиъ сабпиб вуди варитIан аьхю фонтан ачмиш гъапIну. Му йигъан Дагъустандин девлетлу ирс уьбхюрайи хазна вуйи, йигълан йигъаз инсанарин чахьна вуйи маракьлувал артухъ-артухъ апIурайи Дербент шагьриз агъзрариинди инсанар уч гъахьну. Дурарин арайиъ, гьелбетда, гьюкмин заан вакиларра айи.
Фонтан сабпи ражари вуди гьяракатнак кипдар Дагъустандин Глава Сергей Меликов, Урусатдин культурайин министр Ольга Любимова, РФ-дин Госдумайин депутат Хизри Абакаров ва Дербентдин глава Рустамбег Пирмягьямедов вуйи.
Му шадлугънан аьхю серенжемдиз гьацира Урусатдин вице-премьерар Александр Новак ва Дмитрий Чернышенко, Урусатдин Президентдин администрацияйин кIулиъ айирин заместитель Мягьямедсалам Мягьямедов, Сбербанкдин президент Герман Греф, сенатор Сулейман Керимов ва хъана жарадар дуфнайи. Вари дуфнайидарин кьадар 35 агъзурилан зиина вуйи.
Серенжем ачмиш апIури, Сергей Меликовди дидин иштиракчйириз чухсагъул мялум дапIну, му тарихи гьядиса вуйиваликан гъапну.
Урусатдин культурайин министр Ольга Любимовайира дербентлуйир шаду гьядисайихъди тебрик гъапIну: «Гъи узу мушваъ иштирак шулайивалиин дамагъ апIураза. Му аьлматнан дарамат арайиз хпан бадали зегьмет гъизигдариз аферин! БицIирихъан аьхюрихънакьан хяларихьна аьхю гьюрматниинди янашмиш хьувал аьдат дубхьнайи дагъустандин жилиин туристариз азад вахт адапIуз ва рягьятвал гъадабгъуз ужуб мумкинвал гъабхьну. Мицдар шадлугънан серенжемар учвуз хъана артухъ ишри!» – гъапну министри.
Герман Грефди чан улхбаъ къайд гъапIганси, шубуд йис мидиз улихьна чав ва Сулейман Керимовди Дербентдиз гъафиган, дурари цIийи алапIнайи парк шагьрин гавагьир дубхьну ккунивалин къарар адабгънийи. Гизаф проектариз дилигну, арайиз гъабхьи проектдиъ, фонтан тикмиш апIурайи вахтнара, дигиш’валар тIаъри гъахьну. Мисалназ, сад йис улихьна фонтандин проектдик библиотека ва техника жигьатнаан лап читин тикилиш – жиликк ккайи музей кипну.
Му фонтан Урусатдиъ варитIан аьхюб вуйибси, гизаф инсанарин пишекарвалин устадвал ачухъ апIурайи дараматра ву. Думу Дагъустандин сяняаьткарарин аьдатар уьрхюри, табиаьтдин ерли гъвандикан тикмиш дапIнайиб ву. Думу ерлешмиш дубхьнайи йишван кьадар 4715 квадратдин метр ву, ва фонтандиъ 30 метр ягълишназ шид гатIабхьура. Фонтан аквнан 1368 прожекторихъди тямин дапIна ва гьарсаб жа-жаради кабхьузра шлуб ву.
Аьжайиб шлу му дарамат тикмиш апIбаъ иштирак’вал гъапIдарикан 11 касдиз Сулеман Керимовди ва Герман Грефди пешкешар тувнийи.
Шадлугънан серенжем машгьур артистарин – Жасминдин, Михаил Турецкийин «SOPRANO» хорин, «Лезгинка» ансанблин ва хъана жара артистарин концертдиинди давам гъабхьнийи. Аьхириъ завуз варжариинди фейерверкар деетну, уч духьнайидар хъана гьяйран гъапIнийи.
Дагъустандиз му неинки ерли агьалйир, хъа гьацира гъирагъдилан туристар жалб апIру ужуб мумкинвал гъабхьну.
