Дагъустан Республикайин Конституцияйин йигъ къайд апIури, республикайин кIулиъ айи Сергей Меликовди пишекарвалин рякъюъ заан дережайин хъуркьувалар улупурайи культурайин, экономикайин, илимдин, спортдин, образованиейин, сагъламвалин ва жара цирклариъ лихурайи 40 кас гьюрматнан кагъзариинди, премйириинди, ччвурнан сяътариинди гьюкуматдин заан пешкешариинди, лишанлу гъапIну.
Дурарин арайиъ Хив райондин С. А. Аллагьвердиевдин ччвурнахъ хъайи АрхътIарин гъулан кьялан мектебдин ккергъбан классарин мялим, улупнайи гъулан «Улыбка» кIуру бицIидарин багъдин заведующий Зарема Сейфуллагьовна Исмяиловара айи.
Зарема Исмяилова гъи райондиъ хилар хъержвну, урхурайдарихь юкIв дипну, мелзниин сюгьюр кайи гаф алди, бицIидариз жан гъурбан апIури, илим туврайи мялимарикан сар ву. Дугъу дарс киврайи баяр-шубари райондиъ, республикайиъ, вари Урусатдиъ гъягъру конкурсариъ, викторинйириъ аьхю аьшкьниинди иштираквал апIура ва варжариинди гьюрматнан кагъзар, лайикьлу пешкешнан йишвар гъазанмиш дапIна. Дугъан хиликк мектеб ккудубкIу выпускникарин арайиъ гъизилин ва арсран медалариз сагьиб духьнайидарра хайлин а.
Зарема Сейфуллагьовнайин ччвур гъи райондиъси, ДГУ-йиъ, ДГПУ-йиъ, Тахо-Годийин ччвурнахъ хъайи НИИП-диъ, ДИРО-йиъ лезги чIалниин лихурайи мялимариз, аьлимариз мялум ву. Фицики дугъу 1-пи классдиз букварихьна вуйи электронный презентация, 2-пи классдиз, учв автор вуди, лезги чIалнаан вуйи китаб ва гьадму китабдихьна дарсарин ва тематический планар дюзмиш дапIна. Зарема Исмяиловайин варжариинди макьалйир, шиърар республикайин газатариъ, журналариъ чап дапIна. Хив райондиъ ва Мягьячгъалайиъ мялимари, ккергъбан классарин мялимарин методобъединенйирин заседанйириз, бабан чIалнаан ва литературайиан серенжемариз дугъаз гьюрматлувалиинди дих апIури, ФГОС-дин цIийи тIалабариз жаваб тувру дугъан планарикан, презентацйирикан мянфяаьт ктабгъури, дурар ляхниъ ишлетмиш апIури шулу.
Мицдар хъуркьувалар айи заан дережайин категорияйин мялим Зарема Сейфуллагьовна гьар цIийи урхбан йисандин эвелиъ райондин администрацияйин ва образованиейин отделин, республикайин образованиейин министерствойин терефнаан чухсагъул мялум апIру гьюрматнан кагъзариинди лишанлу апIури шулу. Нубатнан ражари, 26-пи июлиъ республикайин Главайин къарарниинди Зарема Исмяиловайиз «Дагъустан Республикайин лайикьлу мялим» кIуру ччвур тувну.
Лайикьлу ччвур тебрик апIури, Зарема Исмяиловнайиз, гевюлиъ гьарган жигьилвал, хъа ляхниъ заан хъуркьувалар ккун апIурхьа!
