Хабаровский крайдиъ Дагъустан Республикайин правительствойин вакил Бейдулагь Исаевдикан учу газатдин машариъ кми-кмиди мялуматар тувра кIуру касарра хьиди, амма, йиз фикриан, юкIв хъади, намуслувалиинди, чазра, имбударизра хайир кади ляхин апIру касарикан бикIуб, шаксуз, ужуб ляхин ву. Саб терефнаан, жвуван ужудар ляхнар арайиз адагъували дурар апIурайи касдин гевюл ачухъ апIуру ва дугъак хъана артухъ гьевес капIру, хъа, тмуну терефнаан, дугъан тажруба имбудариз нумунара шулу.
Бейдулагь Исаевди Хабаровский крайдиъ республикайин вакилвал апIури, цци 7 йис дубхьна. Дагъустанди чаин илипнайи вазифа ихь ватанагьлийи заан дережайиъди кIулиз адабгъура – дугъу кьюб региондин арайиъ айи экономикайин, культурайин, диндин, спортдин ва жара аьлакьйир яркьу ва сигъ апIуз хайлин зегьметар дизигна. Гъи ихь ватанагьлийи зигурайи жафйир давди гъюдучIвурадар – Хабаровский крайдиъ дагъустанлуйирихьна вуйи рафтар хайлин ужу духьна.
Ич сюгьбатнаъ Бейдулагь Исаевди цIиб улихьнаси учв яшамиш шулайи региондиъ кIули гъубху нубатнан спортдин аьхю серенжемдикан ктибтнийи.
«Ихь уьлкейин президентдин ва Украинайиъ гъябгъюрайи хусуси метлеб айи операцияйин тереф дибисну, Дальний Востокдиъ гъуху серенжемарикан варитIан аьхю серенжем – Урусатдин Игит Нурмягьямед Гьяжимягьямедовдин рюгьяриз бахш дапIнайи, юкьяр дисбаан вуйи чемпионат гъабхьну. Талитариъ вари Дальний Востокдиан 140 спортсменари иштираквал гъапIну.
Йиз фикриан, му жюрейин серенжемар бицIидарин арайиъра кми-кмиди гъахури ккунду, фицики аргъаж шулайи наслариз Нурмягьямед Гьяжимягьямедовсдар касарикан ктибтувал чарасуз лазим ву», – чан фикир ачухъ гъапIнийи йиз сюгьбатчийи.
Бейдулагь Исаевдин гафариинди, Хабаровский крайдиъ Дагъустандихъди аьлакьалу вуйи серенжемар гъахували республикайин экономикайизра хайлин кюмек тувра. Аьхиримжи ражари кIулиъ гъубху чемпионатдин кьяляхъ, регионарин арайиъ айи манзилназра дилигри, республикайиан Дальний Востокдиз гъахурайи сурсатарин кьадар 286 процентдин за гъабхьну.
Сюгьбат давам апIури, Бейдулагь Муслимовичди цци мартдин аьхирариъ цIийиди ачмиш гъапIу Мягьячгъала–Хабаровск, Хабаровск–Мягьячгъала самолетдин рейснаканра мялуматар тувнийи.
Ихь уьлкейиин харижи гьюкуматари санкцйир иливнайивал себеб вуди, Урусатдин агьалйирихьан хайлин уьлкйириз улихьдиси рягьятвал гъадабгъуз гъягъюз шули адар. Му аьгьвалатра Бейдуллагь Исаевди республикайин хайирназ илтIибкIну – сач дугъу Хабаровск крайдиан 15-тIан артухъ чатIху туроператорарин вакилар Дагъустандиз хъади гъафнийи.
Мидин метлебра туроператорар ихь республикайиз туриствалин цирклиан айи мумкинваларихъди таниш апIуб ва хъасин дурари чпин муштарйир цIийи маракьлу маршрутар улупбан бадали Дагъустандиз хъади гъювал вуйи. Гьаддин кьяляхъ кьюбрид регионарин арайиъ самолетдин рейс ачмиш апIбан бадали Бейдулагь Исаевди хайлин чарйир гъизигну. Дугъан кIубанвалин ва ляхниъ зиреквалин натижайиъ гьамусяаьт регионарин арайиъ гьяфтайин арайиъ кьюб ражари самолетдин рейс либхура. Гъи цIийи рейснаъди Дальний Востокдиан ихь гъунши республикйиризра агьалйир тIирхура.
«Му рейснаъди гъюз ккуни инсанар гизаф айивализ лигну, гьамусдихъан тина гьяфтайин арайиъ 4 рейс ачмиш апIбан бадали гафар-чIалар гъахурача. Умудлу вуза, думу ляхинра ич дюз шул кIури», – аьлава гъапIну Бейдуллагь Исаевди.
