Улихьна йигъари Дагъустандин зегьметнан ва яшайишдин артмиш’валин министр Аьбдурягьман Мягьмудовди Табасаран райондиъ министерствойин дахилнаъ айи идарйир ахтармиш гъапIну.
Дугъу чан ахтармишар агьалйирин яшайишдин игьтияжар гьуркIру комплексный центрилан ккергъну. Министриз центрин гъуллугъчйирин ляхин игьтияж айи агьалйириз ужуди гъуллугъ ва хъайивал апIбахьан ярхлади вуйивал гъябкъну. Коллективдин гъуллугъчйирихъди вуйи сюгьбатариан мялум гъабхьиси, дурар чпин вазифйирин гъавриъ адайи. Аьбдурягьман Мягьмудовди, центриъ гьаму кьадар гъуллугъчйир лазим дарувал къайд гъапIнийи.
РД-йин зегьметнан ва яшайишдин артмиш’валин министерствойин жара идарйириъси, Табасаран райондин КЦСОН-дин гизаф гъуллугъчйир центриъра, жара йишвариъра лихура. Дицисдар гъуллугъчйирихъди Аьбдурягьман Мягьмудовди профилактикайин сюгьбатар гъухну, ва дурарикан лихру саб йишв ктабгъуб тIалаб гъапIну.
Министри центрин гъуллугъчйири хъайивал апIурайи агьалйирихъдира телефондиан гафар гъапIну. Къайд дапIну ккун, дурарин гафариинди, центрин гъуллугъчйири вахтниинди чпин вазифйир тамам апIура.
«Ихь буржи агьалйириз шлубкьан артухъ кюмек тувувал вуйихь. Учву йишв’ин апIурайи ляхниз дилигну, агьалйири министерствойи апIурайи ляхниз кьимат тувра. Республикайин районариъ айи идарйир ахтармиш апIруган, гъуллугъчйирин вижнасузвал, жавабдарсузвал рябкъюразуз. Гьамци ляхин апIуз хай даршул. Гьаддиз къайдасузвалар дюз дапIну ккунду», – гъапну Аьбдурягьман Мягьмудовди.
Министерствойин кIулиъ айири агьалйирин яшайишдин тереф уьбхру управлениейин (УСЗН) ляхинра ахтармиш гъапIну. Душваъ кадрйирин политика гъабхбаъра гъуллугънан вазифйир тамам апIури адрувалин, гъуллугъчйириз заан образование адрувалин къайдасузвалар ашкар гъахьну. Министри цIийиди дерккнайи директориз лап багахь вахтнаъ дурар арайиан адагъбан буйругъ тувну.
Аьбдурягьман Мягьмудовди агьалйир ляхнихъди тямин апIбан гъуллугънан ляхинра ахтармиш гъапIнийи ва дидин ляхниъра айи къайдасузвалар терг апIуз вахт улупнийи.
Министр Табасаран райондиз гъягъбан натижйириз дилигну, КЦСОН-дин ва УСЗН-йин бязи гъуллугъчйириз низам-къайда уьбхбан жаза тувди.
