Дагъустандин Каспийск шагьриъ, хъади-хъади Дявдинна гьюлин флотдин парад шули, магьа цци 3-пи йис ву. 31-пи июлиъ кIулиъ гъубшу параддиъ иштирак гъахьи Республикайин Глава Сергей Меликовди ва Каспийский флотилияйин командующий Александр Пешковди, гьюлиин гимйириъ айи эскрар, дурарин гъвалхъан тина катериъди гъягъюри, пишекарвалин машкврихъди тебрик гъапIну.

«Флотдин тарих – думу жюрэтлувалин, ижми низам-къайдайин тарих ву. Гьар йигъан гъуллугъ давам апIури, гьаму тарих бикIурайидар му йигъахъди тебрик апIураза.

Магьа шубубпи ражари вуди, Каспийск шагьриъ, ихь флотилияйин кьувватар улупури, парад шула. Мид’инди ухьхьан дамагъ апIуз шулу. Нубатнан ражари ихь морякарин, летчикарин ва пияда эскрарин заан кIубанвалин шагьидар гъахьунхьа. Гъийин йигъан Каспийскдин флотилия – дирбаш, дяви апIуз шлу тешкилат вуйиб, гьамушв’ан вуйи эскрари, гьамусяаьт Украинайиъ гъябгъюрайи хусуси метлеб айи операцияйиъ тасдикь апIура.
Ккун апIураза гьарсаб рейснаан ихь эскрар сагъ-саламатди хулариз кьяляхъ гъювал.
Чухсагъул учвуз, кIубан касариз, уьмрин гележег флотдин гъагъи ва гьюрматлу гъуллугъназ бахш дапIну, ватанпервервалиинди гъуллугънан буржи тамам апIурайидариз», – гъапну Сергей Меликовди.

Каспийск шагьриъ кIулиъ гъубшу гьюлерин дявдин флотилияйин парадиъ иштирак гъахьи 40 дявдин гимйир, жюрбежюр дявдин хусуси техника, гьадму гьисабнаъди 4 Ми-8 вертолетар ва ВМФ-дин 200 эскрар му йигъа-хьна гьязур шули, хайлин вахт вуйи. Дурарин гьунарназ лигуз параддиз 25 агъзуртIан артухъ республикайин агьалйир ва хялар гъафну.
Шубуб сяаьтдин арайиъ гьюлиин, машкврин йигъахъди аьалакьалу вуди гьязур дапIнайи программа тамашичйириз улупнийи.
Гьадму гьисабнаъди гьюлин гъачагъари гими бисуз алархьиган, фици дурарихъди женг дубхну, гими азад апIуруш, цIа кабхъиган, фици думу гьяракатниинди ктIубшвуруш, дявдиъ гьюлериин али гимйириан фици душмандиз къаршуди женгназ удучIвуруш ва хъанара хайлин жара сягьнйир улупнийи.

Къайд апIуб лазим вуки, цци сабпи ражари вуди, Каспийскдиъ гъабхьи Дявдинна гьюлерин флотдин параддиъ жара гьюкуматариан – Азербайжандиан ва Ирандиан вуйи 100 кас экипаж айи гимйирра иштирак гъахьну.
ВМФ-дин йигъахъди аьалакьалу вуйи парад, тамашичйириз лап кьабул дубхьнайи. Мягьячгъалайиан дуфнайи Зильфира Халиловайи, чан студент байра параддин серенжемариъ, гьюлин гъачгъин роль уйнамиш апIури, иштирак шулайиз кIури, дамагъ апIурайи.
Хъа республикайин туристар му серенжемдиин лап гьяйран духьнайи. Москвайиан дуфнайи Татьянайихьан, чав мициб жюрейин параддиин ва ихь уьлкейиз айи кьувватариин гьяйран духьна-йивал жин апIуз шуладайи.

«Сабпи ражари Дагъустандиз дуфну, мициб эсерлу серенжемдиъ иштирак хьувал гьаммишандиз кIваинди гъубзру гьядиса ву. Фикир дайиз, параддиъ узуз мициб тясир апIур кIури. Эскрари гьюлиин дяви гъабхурайиганси улупу «сягьна» жвуван улариан рябкъювал – думу гафариинди пуз шлуб дар. Чухсагъул Дагъустандиз учу гьамци кьабул апIбаз, гьамциб машкврин серенжемдиъ иштирак хьуз мумкинвал тувбаз», – гъапну республикайиз дуфнайи турист дишагьлийи.

Параддин асас серенжемар ккудукIиган, йигъ хябяхъ шули, кьюб сяаьтдин арайиъ РД-йин культурайин министерствойи тешкил дапIнайи аьхю концертра гъабхьнийи. Концертдин программайин кьяляхъ машкврин фейерверкар гьюлилан деетбиинди, Дявдинна гьюлин флотдин йигъ аьхирихъна гъафнийи.