Гьюрматлу ватанагьлийир!
Ватандин Аьхю дявдин ветеранар ва далу терефнан зегьметкешар!
Учву Ватандин Аьхю дявдиъ аьхю Гъалибвал гъадабгъну 74 йис тамам хьпахъди кIваантIан тебрик апIурача!
9-пи май ихь уьлкейин гьарсар ватандашдиз гирами йигъ ву. Му машквриз ухьу, улариин нивгъар алди къайд апIру машквар, кIури шулхьа, фицики думу йигъан ихь Ватандин азадвал бадали чпин жанар фида гъапIдар кIваин апIурахьа.
Гьяйифки, ихь ветеранарин кьадар йислан-йисаз цIиб шула. Дурарикан гьарсар ихь халкьдин дирбаш’валин, игитвалин, ватандиз вафалувалин чIиви шагьидар ву.
Гьюрматлу ветеранар! Учву гъагъи имтигьнар тувунчва, дявдин цIиан удучIвунчва, аьжаликкан ккудучIвунчва, вари инсаният фашистарин гъияматдихьан гъюрхюнчва. Ичв улихь учу гьарган буржлу вуча, ичв аьхю гьунарназ аьхю аферин, ичв улихь кIул ис апIурача.
Гъит, гьаму машкврин йигъари вари гъалабулугъвал кьяляхъ гъарабхри, гьарсаб хулаз аку шадвал гъюри, ихь халкьдин игит гъалибвали ихь уьлкейин вари агьалйирин юкIвар шад апIри. Учвуз лап марцци кIваан жандин мюгькам сагъ’вал, уьмрин аку, ярхи ва саламат йигъар, кIван манишин, багахьлуйирин ккунивал ккун апIурача. Ихь вари халкьдиз ислягьвал, хушбахтлу уьмур хъапIуз мумкинвал ибшри. Гъалибвалин Йигъ мубарак ибшри!
«Табасарандин нурар» газатдин редакцияйин коллектив
