Игитар кIваълан гьархидархьа!
«Игитарди бабкан шлуб дар.
Дурар уьмри арайиз хуру».
«Игитар кIваълан гьархидархьа» рубрикайиккди туврайи нубатнан макьала Урусатдин яракьлу кьувватари Украинайиъ гъабхурайи хусуси метлеб айи операцияйиъ жюрэтлувал улупури, Ватан бадали ифдин цIадал гьяйиф дарапIу халис игит Мизамудин Зульфикьаровдиз (шиклиъ) бахш апIурача.
Мизамудин 1999-пи йисан 8-пи мартдиъ Хив райондин ЧIира гъулаъ Авчихан ва Зарема Зульфикьароварин хизандиъ бабкан гъахьну. Шубур велед айи хизандиъ думу кьюрпир вуйи.
Багъри гъулан мектебдиъ 9 класс кудукIну, жигьили 10-11-пи классариъ гъудуркьу аьгъювалар Мажвгларин кьялан мектебдиъ гъадагъну.
2016-пи йисан ужудар натижйириинди ЕГЭ-йин имтигьнар тувну, Мизамудин Смоленск шагьриъ РФ-дин яракьлу кьувватарин душмандин дявдин дакьатариз гьавайиъди аьксивал тувру кьушмарин академияйиъ урхуз учIвру. Ужудар аьгъювалариинди урхуб ккудубкIу жигьил лейтенант Челябинск областдиъ ерлешмиш дубхьнайи Чебаркуль шагьриз кьушмарин частназ командирди гьаъру.
Жигьил офицер Украинайиъ гъабхурайи спецоперацияйин женгариъ, дявдин гьяракатар ккергъу садпи йигъланмина иштирак гъахьну. Ватанди чан гъюнариин илипнайи буржи заан дережайиъди тамам апIури, Мизамудин гъябгъюрайи йисан 26-пи апрелиъ ихь арайиан гъушну.
УчIвру дерднаан гъатлан дубхьнайи бабан юкIв…
– Узу, «ккатIабхьну хилиъ айи яракьра, гъач, жан бай. Ихь кьялчIву шурик кубсри, уьл ипIархьа» гъапи вахтна, дугъан жаваб шуйи: «Гъита, дада, пис фикрар, кьастар ва хиялар. Узу ктабгъу рякъ вуйизда… Гъи узу, узухъди хъайи ярар-дустар дявдин майдандиъ, му цIин ялвиъ дитну гъафиган, мушвган узу кIул ккадабгъиган, закурин йигъан йиз кьимат фу хьибди? Узу дурарин машназ фици лигиди, дурариз фу пиди? Вари абйир-бабари чпин баяр мици дявдиан адагъну гъахиган, ихь Ватан шли уьбхиди? Узу ктабгъу рякъ вуйизда, дада».
Гьарган Ватандихъ юкIв убгру му фикрарихъди телефондиан вуйи улхуб аьхирихъна гъюйич. Гъира, телефондин нумрайиз лигури, дугъхьан вуйи дихназ ккилигури, му гафар кIваан адахьурадариз ва жил’ин йишв бихъурадарзуз, Мейлан», – чан дерд гьял апIура Мизамудиндин дада Заремайи.
– Магьа гьаму йигъари ич бализ «Кьягьялвалин орден» тувузра гафар а. Гьелбетда, медалар, орденар, пулар тувну кIури, балин дерд ич гъян’ан кам хьибдар, я думу ккядябхъидар. Ич бай аьхю пулар, хулар, машинар ккунди, девлет хурза кIури, хъачIаккур, гъушур дайи му цирклиз. Чав набалугъди имиди кадабгънайи ва чаз гизаф кьабулди вуйи рякъ вуйда… – Ватандиз жан фида гъапIу баяр кIваълан гьадрархри, дурарин багахьлуйириз чпихьан шлу чарйир агури, гафниинди вая ляхниинди кюмек туврайидариз чухсагъул мялум апIура балин адаш Авчихандира.
– Сабсан ляхни сабур туврачуз. Ич балин маш дябкъну, жвувхьантина гъапIуб-гъабшиб, кубкIуб бабан ццавтIан бетер гьялал дапIну, думу ихь аьдатариинди чан гьаргандиз вуйи хулаъ сикин апIували. Кьадарсуз рази вуча думу багъри ругариина духну, гъулан накьваригъ дугъан накьв хьувалиин. Ав, веледдин накьвдиин рази шлу абйир-бабар даршул. Хъа вушра, велед уларизкьан дяряркъди, мушвхьан-тушвхьан дугъан тикйир-кIусар дюжюхну, духну сикин гъапIу, гъира фу вушра, нашдишра, гьапIнушра аьгъдарди, чпин гьякьнаан саб хабаркьан адарди, мялум дарди дудургнайи эскрарин яснаъ ахънайи абйир-бабар рякъюрайиган, дурарикан фикир гъапIиган, хъана шюкюр ибшри Аллагьдиз кIурача. Гъит, веледари абйир-бабар кьаби-кьюци духьну кивруси ибшри, ва гьич сар абайизна, бабаз дярябкъри, я Рабби, велед уьмриан гъягъру йигъ. Гизаф учIвруб ву, гизаф… – чиб-чпи ккарцура аьхю завал гъядябхъю Мизамуддиндин абйир-бабари.
Мизамудин ихь арайиан гъушнушра, думу чахъди урхури гъахьи баяр-шубариз, чаз дарс киву мялимариз, чахъди сатIиди аьхю гъахьи чвйир-чйириз, багахьлуйириз шаду мудурси, гьялал вуйи касси, жара касдин хайир-шейир жвуванубси гьисс апIру марцци гьякалси гьаммишандиз уларикк, фикриъ ва фагьмиъ гъузди!
