Урусатдин шагьрариъ яшамиш шулайи ихь ватанагьлийири жюрбежюр цирклариъ хъуркьувалар гъадагъруган, дурарин абйир-бабариси, гъуландариси, кIулди жвуван халкьди дурарихъан дамагълувал гьисс апIуру. Ватандин улихь лайикьлуди чпин буржи тамам апIурайи, фунуб-вушра цирклиъ вафалуди зегьмет зигурайи табасаран баяр гизаф а. Учу, дурарин баркаллу ляхникан, саламат уьмрикан, гъазанмиш гъапIу хъуркьуваларикан мялуматар гъадагъуз рякъяр агурача.
Гьаму макьалайиъ узуз Иваново шагьриъ чан хал-хизандихъди яшамиш шулайи Девлетхан Сафарчиевдикан мялумат тувуз ккундузуз. Табасарандин ва Дагъустандин спортсменарин арайиъ думу варидариз таниш ву кIури, гьисаб апIураза. Фицики, гьадму саб вахтна Девлетхан, спортдин юкьяр дисбан жюрейин кчIихбариан Дагъустандин швнуб-саб чемпионатдиъ иштирак’вал дапIну, гъалибвалин йишварин сагьиб гъахьну.
Гъубшу йисан ноябрин вазлиъ Девлетхан Сафарчиев Ивановский областдин грэпплингдин федерацияйин президентди тяйин гъапIну. Къайд апIуб лазим вуки, Девлетхан му гъуллугъниина гъяйиз, область спортдин му жюре-йиан Урусатдиъ варитIан кьяляхъ хъайи регионарикан саб вуйи. Девлетхан, хилар хъиржвну, сабпи йигълан мина ляхнихъ хъюгъну. ЦIийи йисхъан мина дугъу областдиъ грэпплингдиан шубуб турнир тешкил гъапIну. Жигьилари ва живанари аьхю аьшкьниинди спортдин гьаму жюре ктабгъуз хъюгъну.
Магьа гьаму йигъари (6-пи майдиъ) Рязань шагьриъ грэпплинг ва грэпплингги спортдин кчIихбарин жюрйириан Кьялан Федералин округдин чемпионат гъабхьнийи. Душваъ Ивановский областдин командайи 4 гъизилин, 5 арсран, 10 кемшрин медалар гъадагъну.
Талитариъ 15 региондиан иштирак гъахьи вари командйирин арайиъ Ивановский областдин команда варитIан заан хъуркьувалар улупу хьуб командайин сиягьнак кабхъну, ва натижайиъ гьаму йисан август вазлин 1-4-пи йигъари грэпплингдиан Орел шагьриъ кIули гъябгъру Урусатдин чемпионатдиз 9 путевка гъазанмиш гъапIну. Къайд апIувал лазим вуки, Ивановский областдин командайин дахилнаъ кьюр табасаран байра а. Девлетханди тренерарихъди сатIиди жигьил спортсменар цIийи талитарихьна гьязур апIура. Дурариз гележегдиъ хъана заан хъуркьувалар ккун апIурхьа.
Учв Девлетхан Табасаран райондин ЦIанак гъул’ан ву. Дугъу Ивановский областдин гьюкуматдин университетдин юридический факультет ккудубкIну. Чан уьмрин юлдаш Фаризайихъди кьюр велед тербияламиш апIура. Думу дилаварчивалин ляхниинра машгъул ву.
Ич сюгьбатнаъ Девлетханди, Табасарандиъ жигьилариз чпин удукьувалар улупуз цIибтIан мумкинвалар адруваликан, хъа ихь жигьилар Урусатдин жара халкьарихь тевиган, гизаф зигьимлудар вуйиваликан улхури, багъри райондин жигьиларихъан юкIв убгури, зегьмет зигурайи Мартин Сефербеговдиз, Багьаудин Абасовдиз ва жара баяриз чухсагъул мялум гъапIнийи.
