Улихьна йигъари Азербайжан Республикайин меркездиъ ММА жюрейин спортдиан вари халкьарин турнир кIули гъубшну. Думу турнириъ Дагъустандианра спортсменар иштирак гъахьну. Дурарин арайиъ ихь кIубан спортсмен Алан Рашидовра айи.
Алан жюрбежюр талитарихьна гьязур апIурайир дугъан адаш Алим Рашидов ву. Ихь бицIи чемпионди Бакуйиъ гъубшу турнириъ нубатнан ражари гъалибвалин йишв гъадабгъну. Алим Рашидовди турнириз чпин «Скорпион» спортдин клубдиан 7 живан баяр хъади гъушну. Дурарикан юкьури 1-пи, кьюри – 2-пи ва сарисана – 3-пи йишвар гъадагъну.
Хъа Аландин гьунарарикан кIуруш, турнириъ думу кьюб ражари Азербайжандин спортсменарихъди талитназ удучIвну ва дурариин улупнайи вахт ккудубкIайиз гъалиб гъахьну.
Гьелелиг Алан гъалиб дархьи талитар зат духьнадар. Дугъаз гьаммишан хъуркьувалар хьуб ккун апIурхьа.
