Сефижат Кьасумова 16-пи августдиъ РД-йин образованиейин ва илимдин министр Ягь’я Бучаевди республикайин махлукьатлу дакьатарин вакиларихъди пресс-конференция кIули гъубхну ва ГИА-2022 кампанияйин, бицIидари сагъламвал гъадабгъбан хьадан кампанияйин натижйирихъди, мектебариъ рас апIбан ляхнар гъахувалихъди ва цIийи урхбан йисахьна гьязур хьувалихъди, гьацира гьяракатнаъ гьяракатнаъ убчIвнайи «Профессионалитет» программайихъди аьлакьалу суалариз жавабар тувну.
ГИА-йин натижйир йивури, министри къайд гъапIганси, 2022-пи йисан Дагъустандиъ ОГЭ 36262 выпускникди, хъа ЕГЭ 13551 выпускникди гъибикIну. Цци республикайиъ профильный математикайиан гъидикIу ляхнарин кьялан балл за гъабхьну, хъа 31 выпускникди жюрбежюр предметариан ЕГЭ 100 бализ гъибикIну.
БицIидари сагъламвал гъадабгъбан хьадан кампанияйин гьякьнаан улхури, Ягь’я Бучаевди цци 30 агъзурилан зиина бицIидариз дициб мумкинвал дубхьнайиваликан гъапну. Гьаму йисан республикайиъ 122 лагерь гьяракатнаъ а, гьадму гьисабнаан 26 аьдати лагерар, ва 96 – мектебариъ ачмиш дапIнайидар. Гъюру йисан стационарный лагерарин кьадар 10-ди- инди артухъ апIбанди ву.
«БицIидари сагъламвал гъадабгъбан хьадан кампания-йиз деебтнайи пул гьаму йисан 59 процентдиинди артухъ гъапIну. Му читин гьялнаъ айи хизанариз ужуб кюмек гъабхьну. Цци дицдар гъатарик кахьрайи 5000-рилан зина бицIидариз сабпи нубатнаъди путевкйир тувну. Гьацира му йисан сабпи ражари вуди майифвал кайи 140 бицIири лагерариъ сагъламвал мюгькам гъапIну. Гъюру йисан му кьадарра за апIбанди ву», – гъапну Ягь’я Бучаевди.
Образованиейин тешкилатариъ рас апIбан ляхнарин гьякьнаан министри туву мялуматариинди, цци республикайин образованиейин 210 дараматдиъ рас апIбан ляхнар гъахура. Дурарикан 7 рас дапIну ккудукIну, 110-сана улупнайи вахтназ ккудукIбанди ву. Мидланра савайи, 3 сменайин къайдайиъди урхувал ккутIбан бадали, Дагъустандиъ 19 цIийи мектебар тикмиш апIура.
Журналистариз Ягь’я Бучаевди «Профессионалитет» программа уьмриз кечермиш апIуз хъюгънайиваликанра ктибтнийи. КIваин апIурача, му федеральный проект гизафси игьтияж айи пишйириан заан дережайин пишекарвалин кадрйир гьязур апIбаан цIийи гъурулуш ву. Думу колледжариъ урхурайидар, гъулан мяишатдин гьясиллувалин гьякьикьи шартIар яратмиш дапIну, гьязур апIуз диш дапIнайиб ву. Дагъустандиъ «Профессионалитет» программа Буйнакск шагьриъ Ш.И. Шихсаидовдин ччвурнахъ хъайи гъулан мяишатдин колледждиъ, Урусатдин мярифатнан министерствойин интернет майдандин бинайиин алди, уьмриз кечирмиш апIуз хъюгъна.Проектдин индустриальный партнер ООО «Анжелина» кадабгъна. Му программайиъ гьацира жара тешкилатарира иштирак’вал апIура. Пресс-конференцияйиъ гьацира министрин заместитель Аида Далгатовайи ва министерствойин отделарин кIулиъ айидари журналистарин хайлин жара суаларизра жавабар тувнийи.
