Улихьна йигъари Хив райондин ВертIил гъулан багахь хьайи «ЧIихтIил» майдайдиин ВертIил гъулан агьалйирин «Гъуландарин гюрюш» ччвур тувнайи серенжем гъабхьну. Думу тешкил гъапIур гъулан агьали, Хив райондин депутатарин собраниейин депутат Айдемир Рамазанов ву.
Айдемир Рамазановди «Табасарандин нурар» газатдиз мялум гъапIганси, серенжем тешкил апIбан асас метлеб – хайлин йисари гъулхьан ярхла духьнайи гъуландар багъри ватандиз гъюб, аргъаж шулайи насларихъди таниш хьуб ва гьацира чпин веледар ватандихъди, гъуландарихъди, аьдатарихъди, бабан чIалнахъди таниш апIуб вуйи.
«Му серенжем тешкил апIуз теклиф дивдар ва вари харжар чпиина гъадагъдар жара йишвариъ яшамиш шулайи ич гъуландар вуйи. Ставрополь крайиъ, Астраханский ва Тульский областариъ, республикайин жара районар шагьрариъ яшамиш шулайи 200- тIан артухъ вертIлар гюрюшнаъ иштирак гъахьнийи. Гьацира серенжемдиз учу гьюрматлуди хяларизра теклиф гъапIунча. Дурарин арайиъ Дагъустандин Халкьдин Собраниейин депутат Расим Гьяжиагъаевра айи. Серенжем кIули гъубхур ич гъулажви Фатяли Мягьямедов вуйи», – гъапну Айдемир Рамазановди. Сюгьбатчийин гафариинди, серенжемдин дахилнаъди шадлугънан мяракара ва спортдин жюрбежюр жюрйириан талитарра тешкил гъапIну.
Гъалибчйириз пешкешар тувну. ВертIларин гъуландарин гюрюшдин гьякьнаан чан фикрар Расим Гьяжиагъаевдира ачухъ гъапIнийи. Дугъан гафариинди, му ужуб гьядиса ву.
«Гьамциб жюрейин серенжемар гьарсаб гъулаъ хьуд йисак саб ражарикьан тешкил апIуйиш, аргъаж шулайи насларин ватандин, багъри гъулан тарих кIваълан гъябгъидайи. Жвуван гъуландар фужар вуш агъяди гъубздийи. Гъи ихь наслар ухьу сар сарихъди таниш дарапIиш, закур дурариз гъуландар, багахьлуйир фужар вуш агъяди гъубзидар», – гъапну депутатди.
Ав, икибаштIан му жюрейин серенжемар гъахуб ужуб тажруба ву. ВертIларин гъуландари гюрюшсиб мярака жара гъулариъра тешкил гъапIнийиш, белки, жигьилариз гъул артмиш апIуз, бабан чIал дудрубгуз, багъри ватандиз кьяляхъ гъюз ккун хьибдийи. Йиз фикриан, гьамцдар серенжемар гьарсаб гъулаъ тешкил апIуб чарасуз ву.
Шиклариъ: Хив райондин ВертIларин гъул.
