Улихьна йигъари Нижневартовскдиъ дуланмиш шулайи табасаран риш Гюльназ Мурадовайиз «Урусатдин гьюрматлу хореограф» кIуру жямяаьтлугъ ччвур тувну. Думу Мамедгъала поселокдиъ бабкан ва аьхю гъахьну, дугъан адаш Табасаран райондин ТIивак гъул’ан, хъа дада – Чювккен ву. Му заан пешкешнахъди думу мубарак апIбан метлеб ади ва дидихьна вуйи рякъкан ктибтуб ккун апIури, гьамусяаьт ватандиз дуфнайи Гюльназдихъди гюрюшмиш гъахьунза.
Гьякьлуди кIуруш, ихь дишагьлийири хореографдин пише тек-бирра ктабгъури шулдар, фицики дурариз чпиз удукьувалар ашра, дид’ин зарбди юкIв алшра, дагълу аьдатари думу арзу хиял уьмриз кечирмиш апIуз манигъ’вал апIруб аьгъя.
Хъа Гюльназди, сабдизра дилигди, чан кIван мурадар умудлуди кIулиз адагъну.
– БицIидихъанмина искусство-йиин, яратмиш’валиин гизаф юкIв алир вуйза. Мектебдиъ урхурайи йисари дурариан вари жюрейин кружокариз гъягъюри гъахьунза. Гьелбетда, вари табасаран хизанариъси, ич хулаъра халачира гъядарди шулдайи. Дидланра гъайри, гьар хьадну тIумтIин багъларигъ, бистан-бахчайиъ лихури шуйча. Мюгьлет зат шулдайи, вушра художественный мектеб гъизилин медализ ккудубкIнийза. Думуган художественный мектебдин директор Валерий Афанасьевич Куцев вуйи. Гьаму касдин жягьтлувалиинди йиз кьюб ляхин Москвайиз ВДНХ-йиз кьабул гъапIнийи. Мамедгъалайин 2-пи нумрайин мектебдиъ урхури, учу волейболиан талитаризра гъягъюри гъахьунча.
Ялхъвнариан йиз насигьятчи, урхбахьна узук рюгь капIур ва культ-просветучилищейик урхуз кучIвуз кюмек гъапIур йиз сарпи мялим вуйи. Гьелбетда, дадайиз, багахьлуйириз йиз пише затра кьабулди дайи, гьапIру ялхъвнар, шубари, вахт гъабхьиган, швуваз душну, хизан ккебгъну ккунду, кIуйи.
Культпросветучилищейиъ узуз рякъ улупур «Лезгинка» ансамблин лайикьлу артист, ихь ватанагьли, гьюрматлу Назир Идрисов вуйи. Училищейик учухъди урхуз кучIву 15 касдикан, думу ккудубкIну, хореографар гъахьидар 9-тIан дайи, фицики урхбахьна заан тIалаблувал айи. Аьхиримжи курснаъ айиган, йиз планар хизандиъ гъабхьи бедбахтвали кьяляхъ гъивнийи – адаш вахтсузди уьмриан гъушнийи. Адаш узу ктабгъу пишейиз разивал улупу ялгъуз кас вуйи.
Хъасин учухьна Нижневартовскдиъ дуланмиш шулайи багахьлу кас Нижневартовский гьюкуматдин университетдин проректор Ибрагьимов Ибрагьим Мутелимович хялижвди гъафнийи. Дугъан чан ансамбль ади, хъа амма ляхин улихь дярябгъради гъабхьну. Ва дугъу узкан сад йисазди чаз кюмекчиди гъюб ккун гъапIнийи. Яшамиш шулайи йишв дигиш гъапIиш, адашин дерд яваш шул кIури, дадайихъдира мясляаьт дапIну, дугъан теклиф кьабул гъапIнийза. Гьаци йиз ватандихьан 5 агъзур километрин манзилнаъ айи Нижневартовскдиз адахъунзу. Хъасин вуздикра урхуз кучIвну, дадайиканра йиз мурадар кIулиз адагъуз манигъ’вал дарапIуб ккун гъапIнийза. Душваъ «Кавказ» ансамблиъ халуйихъди ляхин апIури, ужуб тажруба гъадабгъунза. Гьамус узуз йиз коллектив азуз. Цци дидин 6 йис шула, отчетный концерт тувуз гьязур шулача. Жюрбюжюр шагьрариз гъягъюри, хъуркьуваларра гъазанмиш апIури шулча. ЮкIв али пишейиъ ляхин апIури магьа 22 йис вуйиз. Му рякъюъ йиз «хил гъибисдариз» уьмурлугъ вуди аферин кIураза.
– Увузра чухсагъул, Гюльназ. Гъит увуз ва яв коллективдиз хъана заан хъуркьувалар ишри.
Шиклиъ: Гюльназ Мурадова (кьялаъ) чан ансамблин иштиракчйирихъди.
