Урусатдин Федерацияйин мярифатнан министерствойи мектебариъ дарсариъ мобильный телефонар ишлетмиш апIувал къадагъа гъапIну. Тялукь норма санитарный цIийи къайдйириъ тIапIну. Гьаддин гьякьнаан ведомствойин кIулиъ айи Сергей Кравцовди мялумат тувну.
«Урхбан цIийи йислан башламиш дапIну, дарсариъ мобильный телефонар адагъуз вая ишлетмиш апIуз ихтияр адар. Дурари урхурайидар дарсарихъан хътахъуз гъитру», – гъапну министри вариурусатдин абйир-бабарин собраниейиъ.
Дугъу аьлава гъапIганси, чарасуз гьял арайиз дуфну, абйир-бабариз зенг апIуб лазим гъабхьиш, баяр-шубари мялимдихьна илтIикIну, ихтияр гъадабгъну ккунду.
Сергей Кравцовди къайд гъапIганси, мобильный телефонари баяр-шубарин сагъламвализра чIуру тясир апIура. Мектебариъ гьацира электрон жюрейин учебникар ва тетрадар ишлетмиш апIувалра планламиш дапIнадар.
