Советарин Союздин девриъ хьадан аьхириъ, чвлин фаслин вахтнаъ Яракьлу кьувватарин жергйириъ гъуллугъ апIурайи эскрар, вузариъ, сузариъ урхурайи студентар гъулан мяишатдиин ляхнариз кюмек апIуз гьауйи. Узбекистандиъ бамбаг, Кубандиъ тахил, Дагъустандиъ тIумтIар уч апIуз ва гьацдар жара ляхнариина жалб апIуйи. Йиз фикриинди, думу тажруба гизаф ужуб вуйи: шагьрариъ бабкан гъахьидар гъулан мяшатдин ляхнихъди таниш хьуз, дурарин зегьметнахьна, зегьметкешарихьна гьюрмат тербияламиш апIуз, студентариз стипендияйин зиина кепкар гъазанмиш апIуз мумкинвал шуйи.

 

 

Михаил Горбачевдин ичкийиз аькси компанияйин вахтнаъ Крымдиъ, Дагъустандиъ ва уьлкейин жара йи-швариъ айи тIумтIин багълар вари алдатIнийи. Амма Горбачевдин «къуру къанунди» ички убхърударин кьадар цIиб гъапIундайи. Гьаддихъди сабси студентар гъулан мяишатдин ляхнариз кюмек апIуз гьаувалин аьдатра ккутIнийи.

Дидхъан мина 37 йис гъубшну. Уьлкейин кIулиъ айидарра, деврин тIалабарра дигиш гъахьну. ТIумтIин цIийи багъларра кивну, думу багълариан ужуб бегьерра гъадабгъуз хъюгъна. Гьаму йисан Дагъустандиъ 240-250 агъзур тонна тIумтIар уч апIбанди ву. Гъубшу йисан республикайин тIумутIчйири лап ужуб бегьер – 238 агъзур тонна тумтIар – ккадабцIну.

Августдин 27-пи йигъан Дербент райондиъ гъабхьи тIумтIар уч апIбан субботникдикан дарпиди гъитуз шулдар. Гьадму ужуб ляхин тешкил гъапIур РД-йин Правительствойин председатель Аьбдулмуслим Аьбдулмуслимов вуйи. Субботникдиъ дугъан заместителар – Руслан Аьлиев, Мурад Къазиев, Нариман АьбдулмутIалибов, Заур Эминов, гьацира вари министерствйирин ва идарйирин коллективар иштирак гъахьнийи.

Дербент райондин КIежюх гъулаъ Аьбдулмуслим Аьбдулмуслимовди субботникдин иштиракчйириз, му хайирлу ляхниъ иштирак шулайивализ лигну, чухсагъул гъапнийи.

«Советарин деврин вахтнаъ бицIидар багъри жил ккунди вердиш апIуйи. Зегьметну инсан абурлу апIуру, кIуру айту айи. Думу гафар йиз уьмрин рякъюн асул вуйиз. Узу гъулаъ бабкан гъахьунза, гъулан мяишатдин зегьмет ккунди тербияламиш апIбаз, йиз абйир-бабарикан гизаф шад вуза», – гъапнийи республикайин правительствойин кIулиъ айири, суботникдин иштиракчйирихьна илтIикIну.

Гьадму йигъан субботникдиъ иштирак гъахьи гьюкуматдин ляхнариъ лихурайи гъуллугъчйири 20 тоннайихьна тIумтIар уч гъапIнийи.

КIваин апIуз ккундузуз, 2018-пи йисан КIежхин тIумтIин багълариз Урусатдин гъулан мяишатдин министр Дмитрий Патрушев гъафнийи. Думуган федеральный министерствойин кIулиъ айири, Европайиъ саб йишвахь 872 гектариъ тIумтIин багълар айи йишв анжагъ саб КIежюх вуйиваликан, мушван багълар Урусатдин ужударсдар тIумтIин багълар цIиб апIурайиваликан гъапнийи.
Гъулан зегьметкешариз гъизгъин йигъар улукьна. Учвуз ужудар бегьерар гъадагъуз Аллагьди кьувватра, ужудар гьавйирра тувричвуз!