Дагъустандин региондин идара апIбан центрин (ЦУР) вакилари гьяр гьяфтайиъ муниципалитетарин главйирихъди, министрарихъди, жюрбежюр идарйирин кIулиъ айидарихъди прямой эфирар тешкил апIура. Агьалйирихъди вуйи сюгьбатнаъ эфириз дих дапIнайидари тялукь цирклиъ вая муниципалитетдиъ арайиз дуфнайи варитIан учIру суалариз жавабар тувра.
31-пи августдиъ Дагъустандин ЦУР-ди тешкил дапIнайи прямой эфириъ Дагъустандин Огни шагьрин кIулиъ айи Жалалудин Аьлирзаев иштирак гъахьну. Дугъу шагьриъ айи яшайишдинна экономикайин важиблу месэлйир гьял апIбакан гъапну, региондин ЦУР-дин пишекрари ва прямой эфириъ иштирак шулайи аьдати агьалйири хъирчу суалариз жавабар тувну.
«Шагьрин главайин гъуллугъниин узу тяйин гъапIхъанмина кьюд йисна гьацIкьан ву. Гьаму вахтнан арайиъ жюрбежюр программйириъ иштирак духьну, жямяаьтлугъ 14 ва хуларин багахь хьайи 15 аьтраф къайдайиз духнача. Гъубшу йисан бицIи шагьрарин арайиъ кIули гъубшу Вариурусатдин конкурсдиъ ич проект варитIан ужударикан гьисаб ва дидиз 75 миллион манат жара гъапIнийи. Проект уьмриз кечирмиш апIбан бадали вари 85 миллион манат харж гъабхьнийи.
Гьамусяаьт Дагъустандин Огни шагьрин гьацIкьял гизаф уткан дубхьна. Дербентдиз гъафи туристари хябяхъдин вахтнаъ ич шагьриъра рягьятвал гъадабгъури шулу. Ерли тешкиллувалин проектарра кIулиз адагъурача. Гьаму йисан федеральный ва республикайин программйирин дахилнаъди жямяаьтлугъ 5 ва хуларин улихь хьайи 1 аьтраф къайдайиз духну ккунду.
Огни шагьриъ бикарар гизаф а. Шагьрин ляхин апIуз удукьру агьалйирин аьхюну пай жара йишвариз ляхин апIуз гъягъюру. Гьаму месэла учIруди дийибгъна, хъа гьаддин зиинра ляхин апIурача», – гъапну Ж. Аьлирзаевди.
Шагьрин кIулиъ айири Дагъ.Огнийиъ мектебар, бицIидарин багъар гьуркIри адрувалин месэлара гъитIибккнийи. Шагьриъ айи миржиб мектебдикан 4 мектеб даргъурайи гьялназ дуфна. Кьюб мектеб 2023-пи йисан капитально рас апIуз проектар гьязур дапIна. Хъа даргъурайи 4 мектебдин ерина цIийидар тикмиш дапIну ккунду.
Аьлирзаевди къайд гъапIганси, шагьриъ 200 бицIир кьабул апIуз шлу, 1-пи сентябриъ ачмиш апIурайи бицIидарин багъ республикайиъ ачмиш апIурайи багъарикан варитIан уткануб ву.
Дагъ. Огни шагьрин варитIан учIру месэла – агьалйирштухъди тямин апIувал ву. Шагьрин 30 процент агьалйир убхъру марцци шид адарди яшамиш шула. Думу пай агьалйири жилиан шид адабгъну, гьадму шид ишлетмиш апIура. Шагьриз шид хурайи турбйир гъубшу аьсрин 60-пи йисари ккивдар ву, дурар сифарси духьна, гизаф шид деебтубси, гагь милин, гагь тлин шид крябхюз хъюбгъру. Гьар йисан думу турбйирин 700 метр – 1 километр гьюдюхюз мумкинвалар агурача.
Шагьриъ канализацияйин месэлара гъагъиди гъубзра. Ерли гьюкмари думу месэлйирин зиинра ляхин гъабхура. Жалалудин Аьлирзаевдин гафариинди, кьюд-шубуд йисандин арайиъ (2024-пи йисаз) шагьриъ канализацияйин месэла гьял дапIну ккудубкIну ккунду.
Дагъустандин Огни шагьрин кIулиъ айири Донбассдиъ гъийиху шагьрин вакилариканра гъулхнийи.
«Урусатдин Федерацияйи Украи-найиъ хусуси метлеб айи операция ккебгъхъантина Дагъустандин Огни шагьриан вуйи 10 эскер гъийихну, дурарикан 8 касдиз йикIбан кьяляхъ Кьягьялвалин орден тувну. Ихь эскрарин суратар шагьриъ учIвру рякъюхъ керхна. Гаф тувраза, дурарин ччвурар гьархидархьа. Учу гьадму кьягьяларин уьмрикан, гьунарарикан мялуматар тувру музей ачмиш апIбанди вуча», – гъапну Жалалудин Аьлирзаевди.
