Игитар кIваълан гьархидархьа!

 

 

Вари 18 мектебариъ кIули гъушу пашманвалин серенжемариъ гьюрматлу хялари иштираквал гъапIну. Гьаци, Табасаран райондин глава кьюб серенжемдиъ иштирак гъахьну – Хючнаарин сабпи нумрайин лицейиъ ва ЦIийи Лижв’арин кьялан мектебдиъ гъахи митингариъ.

Хючнаарин сабпи нумрайин лицейиъ Кьягьялвалин орденарин сагьибар вуйи Мевлан Сулеймановдиз, Наврузбег Самурхановдиз, Мягьямед Аьбдуризаевдиз, хъа ЦIийи Лижв’арин кьялан мектебдиъ Кемран Аьрабовдиз ва Аким Гьясраталиевдиз кIваин уьрхбан тахтйир ачмиш гъапIну.

 

Кьюбиб мектебариъра митингар Урусатдинна Дагъустандин пайдгъар за апIбиинди ккергънийи.

«Йисан 3-пи сентябриъ вари Урусатдиъ терроризмдиз къаршу вуйи йигъ къайд апIура. Думу йигъ 2004-пи йисан Бесландиъ гъабхьи завал кIваинди гъибтуз кIури тяйин гъапIнийи. Диди гьюкуматра, инсанарра терроризмйиз вуйи аьксивалиъ сатIи апIура. Гьаддиз учу ихь эскрариз, дурар кIваин уьрхбан тахтйир гьадму йигъан ачмиш апIбанди гъахьунча. Украинайиъ хусуси метлеб айи операция ккебгъхъантина ихь эскрари душваъ, Ватан уьбхюри, чпин буржи тамам апIура. Хайлин ихь баяр гъира Украинайиъ гъягъюрайи женгариъ иштирак шула. Дявдиъ йихбарра адарди шулдар, Табасаран райондиан 34 касди, чпин буржи тамам апIури, думу йивбариъ жанар дивну. Узу дурарин абйир-бабариз дерин башсагълугъвал ккун апIураза. Хъа ихь жигьилариз пуз ккундузуз: гьамцдар игитарихъан нумуна гъадабгъай, ихь чIивиди имбу игитарихъан – генерал-лейтенант Рустам Мурадовдихъан ва генерал-майор Эседулла Абачевдихъан – вари Урусатдин улихь ихь халкьдин ад за апIурайи халис кьягьяларихъан – нумуна гъадабгъай. Гъит дурар гьарган ихь юкIвариъ гъузри!» – гъапнийи Мягьямед Къурбановди чан улхбаъ.
ЦIийи Лижв’арин кьялан мектебдиз Аким Гьясратялиевди гъуллугъ апIури гъахьи Чечен Республикайиъ айи кьушмин частнан командирин заместитель Евгений Подмарковра дуфнайи.

«Аким Гьясраталиевди учв лап ужур эскерси, халис игитси улупну. 27-пи февралиъ Украинайин Херсонский областдиъ гъябгъюрайи дявдиъ думу, аьхю зийнар духьну, али йишв’ин гъакIнийи. Дугъу чан буржи лайикьлуди тамам гъапIну. Гьаддиз уьлкейин Президентдин къарарниинди дугъаз Кьягьялвалин орден тувну. Узуз женгариъ гъийиху Табасаран райондиан вуйи вари эскрарин абйир-бабариз аьхю гьюрматлувалиинди чухсагъулин гафар пуз ккундузуз. Гъит дурар ихь кIваъ гьарган игитарси гъузри», – гъапнийи военный гъуллугъчийи, митингдиъ удучIвну улхури.
Му йигъан райондин мектебарин гьяятариъ гъахьи митингариъ гьацира мектебарин директорар, гъийихдарин абйир-бабар, гъуларин гьюрматлу касар удучIвну гъулхнийи. Варидарин кIурайиб саб вуйи: Донецкдиъ ва Луганскдиъ айи инсанар уьрхюри чпин жанар диву игитар кIваълан гьархну ккундар.
ТинтIарин кьялан мектебдин цалик Кьягьялвалин орденарин сагьибар Шихяли Шихялиевдиз, Къурбан Уружевдиз, Замир Аьлисултановдиз, Найбулла Шихялиевдиз бахш вуйи кIваин уьрхбан тахтйир керхнийи. Гьацира душваъ терроризмдиз къаршу вуди чпин буржи тамам апIури гъийиху, айтIан органарин гъуллугъчйир Алаутдин Къазиевдиз ва Тельман Гьяжибеговдиз кIваин уьрхбан тахтйир ачмиш гъапIну.

«Гьюрматлу ватанагьлийир, мектебдиъ урхурайидар. Ихь арайиан варитIан ужударстар, чпин уьмур хъапIуз хъюгъну имбу ихь гъуландар гъушну. Дурари Урусат бадали, ухьу бадали, чпин жанар женгариъ дивну. Гьамус учвуз гьар йигъан дурарин суратар рякъиди. Дурари ухьуз дюз вуйи рякъ улупура. Гьацдар игитар дюрхну арайиз адагъбан, ухьу дурарин абйир-бабарин улихь кIулар ис апIурахьа», – гъапнийи му серенжемдиъ ТинтIарин советдин глава Хизритдин Саидягьмедовди.
Райондин образованиейин управлениейин кIулиъ айи Аьбдусалам Гьясановди ва райондин депутатарин собраниейин вакил Багьаутдин ТIагьировди райондин администрацияйин терефнаан эскрарин хизанариз лазим вуйи кюмекар тувуз гьязур вуйиваликан гъапнийи.
Хъасин ТинтIарин мектебдиъ урхурайидари гьарсар игитрин биографияра ктибтнийи.
Акъ’арин кьялан мектебдин цаликра 3-пи сентябриъ шубур касдиз кIваин уьрхбан тахтйир керхнийи: Закир Рашидовдиз, Мурад Гьяжимурадовдиз ва Аьраб Аьрабовдиз. Му серенжемдизра гьюрматлу хялар дуфнайи – Табасаран райондин ЦБС-дин директор Рафик Аьлиев, ЦIурутIларин мектебдин директор Руслан Аскеров, ва гьацира мялимарин коллектив.

«Гьюрматлу гъуландар ва хялар!
Вари вахтари Дада, Хизан, Ватан кIуру гафар гьарсар касдиз гирами гафар ву. Ухьу гьарсар дюн’яйиина хусуси мяна-метлеб ади гъюрахьа, хъа ухьу вари сатIи апIурайиб – Ватандихьна вуйи ккунивал ву. Тербия тувбаъ хизандина мектебди чпин зегьметар сатIи апIували гьарсар бицIир гьаци, кIваъ Ватандихьна ккунивал ади вердиш хьуз гъитра.
Вахтсузди уьмриан гъушу Закир Рашидовдин, Мурад Гьяжимурадовдин, Аьраб Аьрабовдин багахьлуйир ва мялимар!
Узуз учву ихь мектебдиъ урхури гъахьи игитарихъ харж гъапIу ичв зегьметназ ва сабурдиз аьхю чухсагъул пуз ккундузуз. Учву Ватандин лайикьлу баяр гьязур гъапIунчва! Дурари гъапIу игитвалар гъюзимбу наслариз лап аьхю дарс хьибди, хъа ихь юкIвариъ му ччвурар гьаргандиз гъузди.

Гъи ухьу ихь мектебдиъ гъурху гьаму баяриз кIваин уьрхбан тахтйир ачмиш апIурахьа. Ухьу дурариз, дурарин вахтсуз вуди ккудубкIу уьмриз, дюн’яйиин ислягьвал бадали гъапIу дурарин игитвализ икрам апIурахьа!» – гъапнийи чан улхбаъ, серенжем ачмиш апIури, Акъ’арин кьялан мектебдин директорин заместитель Мямядагъа Мурадхановди.
Райондин терефнаан митингдиъ Табасаран райондин ЦБС-дин директор Рафик Аьлиевра удучIвну гъулхнийи, ва дугъу игитарин хизанариз лазим вуйи кюмек апIуз райондин кIулиъ айидар гьязур вуйиваликан хабар тувнийи.

Жвул’арин кьялан мектебдиъ гьюлериин гимйириъ гъуллугъ апIури гъахьи Къазанфер Сулеймановдиз кIваин уьрхбан тахта ачмиш гъапIну. Серенжемдиъ Табасаран райондин главайин заместитель Рамис Уьсманов, райондин депутатарин собраниейин председателин заместитель Аьлимягьямед Къазиев, Табасаран райондин военкоматдин гъуллугъчи Рафик Кьасумов, Гум’арин советдин глава Рамис Насуров, эскрин багахьлуйир, мялимар мектебдиъ урхурайидар, гъуландар, гъунши гъуларин агьалйир иштирак гъахьнийи
«Ихь кIваин илмийихь Къалухъ Мирзайи ва дугъан кьушми аварарин Чох гъулаъ душмнарихъди фици дявйир гъапIнуш. Ихь жилар гъюрхю улихьдин эскрарси, ухьу ихь Къазанфер Сулеймановра кIваинди гъитдихьа», – гъапнийи митингдиъ Аьлимягьямед Къазиевди.
«Ихь уьмриан ужур инсан, аькьюллу эскер, лайикьлу табасаранлу гъушну. Дугъаз чан буржи тамам апIувал, Ватан уьбхювал гьавайи ихтилат дайи, думу дугъан кIваъ айи мяна-метлеб вуйи. Дугъан жикъи ва аку уьмур урхурайидариз ва гъуландариз дюз рякъ ачмиш гъапIуб ву», – гъапнийи Рамис Уьсмановди чан улхбаъ.

 

Украинайиъ кIули гъябгъюрайи хусуси метлеб айи операцияйиъ гъийиху эскрариз кIваин уьрхбан тахтйир ачмиш апIбаз бахш дапIнайи гьаму жюрейин митингар му йигъан Гум’арин (Расул Рустамовдиз), Хянгъярин (Кансав Рамазановдиз), Ярс’арин (Аскендер Сардаровдиз), СиртIчарин (Эльдар Велиевдиз), ТIиварин (Шябан Халикьовдиз, Муса Мусаевдиз ва Байрам Мягьямедовдиз), Курккарин (Абзутдин Къурбановдиз ва Тимур Ханмягьямедовдиз), НичIрасарин (Агъабег Рустамовдиз), Пилгъарин (Закир Шябановдиз), Рушвларин (Алим Фейтуллаевдиз) Хили-Пенжгьарин (Закир Аьлисултановдиз, Баба Мирзабеговдиз ва Вадим Ханмягьямедовдиз), Мягьрягъарин кьюбпи нумрайин (Сагьиб Турабовдиз), ГьепIларин (Тимур Аьбдуллаевдиз ва Аьшурбег Мягьямедовдиз) кьялан мектебариъра кIули гъушну.