Аьхиримжи вахтари дюгю убзурайи хутIларин кьадар йислан-йисаз артухъ апIура. Мисал вуди гъадабгъиш, 2021-пи йисан республикайиъ дюгю 27 агъзур гектарин хутIлариан уч гъапIну, хъа цци думу кьадар 3 агъзур гектарин артухъ дубхьна.
Урусатдин дюгю гьясил апIурайи регионарин арайиъ варитIан ухди Дагъустандиъ дюгдин бегер уч апIуз хъюгъна. Мидин гьякьнаан «Табасарандин нурар» газатдиз Дагъустандин гъулан мяишатдин ва ипIру-убхъру сурсатарин министерствойин пресс-гъуллугънаан хабар тувра.
Сабпи нубатнаъди Къизлар райондин «Кизляр-агрокомплекс» ООО-йиъ дюгдин тахил уч апIуз хъюгъну. Гъийин йигъаз му мяишатдиъ саб гектар хутIлиан 70 центнер бегьер ккадабцIури, 40 гектартIар артухъ хутIлар дургна.
Министерствойиан тувнайи мялуматариинди, му мяишатди сач анжагъ 1600 гектариътIан дугю дубзнадайи. Сад йисандин арайиъ мушваъ дюгю убзурайи жиларин кьадар кьюб ражари артухъ гъапIну, ва цци дурари, 2350 гектариъ дюгю дубзну, бегьер уч апIура.
Къизлар райондин гъулан мяишатдин управлениейин кIулиъ айи Райсат Аьлиловайин гафариинди, цци райондиъ 17,5 агъзур гектар хутIлариан дюгдин бегьер уч апIуз планламиш дапIна.
«Къизлар райондиъ цци дюгю уч апIбан серенжемариъ 76 дюгю убгру комбайнйири ляхин апIиди. Бегьер уч апIбахьна гьязурлугваларин ляхин дубхну сарун ккудубкIна. Жара регионариан комбайнйирра жалб дапIна ва хъанара апIузра кка. Пуз ккундузузки, гъулан мяишатдин технологйирин гьаму деврин цIийивалар ишлетмиш апIурайи мяишатариъ уч апIурайи дюгдин бегьернан кьадар гизаф ву. Думу ухьуз рябкъюрира ахьуз», – гъапну Райсат Аьлиловайи.
Къайд апIуб лазим вуки, гъи республикайин 18 муниципалитетариъ дюгю убзура, хъа варитIан гизаф (55%) Къизлар райондиъ. Тарумовский райондиъра гьаму йисан хутIларин кьадар 60%-дин артухъ гъапIну – душваъ 4789 гектариъ дюгю дубзна.
Дюгю гьясил апIбаан вуйи улупбариинди Бабаюрт районра улихь жергйириъ а. Мушваъ 2360 гектарин хутIлариъ дюгю дубзна. Дюгю убзурайи хутIлариинди ва ккадабцIурайи бегьерниинди, Дагъустан анжагъ Краснодар крайинтIан кьяляхъ хъадар. Гьаму йисан республикайиъ 135 агъзур тоннайин дюгю ккадабцIуз пландиъ а, хъа сачдин кьадар 119 агъзур тонна вуйи. Дюгю убгру комбайнйирин гьякьнаан кIуруш, гьамусяаьт Дагъустандин дюгдихъди ляхин апIурайи муниципалитетариъ тахил убгбан бадали, 141 комбайн гьязур дапIна. Гьаци вуйиган, 212 гектарин хутIлариз саб комбайн алабхъура.
Аьхиримжи йисари республикайиъ дюгю гьясил апIру 4 заводра дивна. Гьаддихъди сабси 65 тоннайин дюгю уьбхру йишварра тикмиш апIура.
Дюгдихъди ляхин апIурайи мяишатариз, хутIларин кьадар 56 агъзур гектариинакьан артухъ апIуз ккунди а. Республикайин улихь-кIулихь хьайидари сад-кьюд йисандин арайиъ региондиъ 150 тоннайин дюгю ккадабцIбан вазифара улихь дивна. Думу гьял апIбан бадали, гъулан мяишатдин ва ипIру-убхъру министерствойи тялукь уьлчйир кьабул апIура.
