17-пи сентябриъ Каспийск шагьрин 75 йисандин юбилей лап яркьуди къайд гъапIну.
Каспийск шагьур Урусатдин жигьил шагьрарикан саб ву. 1932-пи йислан 1947-пи йисазкьан думу Двигательстрой кIуру посёлок вуди гъабхьну, хъасин Каспийск шагьриз илтIибкIну.
Юбилей къайд апIбан серенжемар гвачIнин сяаьт 9-диъ шагьрин кIулин майдандиин ккергънийи.
Мина уч духьнайи шагьристанариз ва хялариз шагьрин ва гьацира республикайин районариан дуфнайи художес-твенный коллективарин хусуси выставка улупбалан кьяляхъ, шагьрин сабпи устйирин, инженерарин ва жара касарин шиклар улупну, завариз 75 лизи луф деетнийи.
Сабпи нубатнаъди Кас-пийскдин агьалйир шагьрин 75 йисандин юбилейихъди дидин глава Борис Гонцовди тебрик гъапIну.
«1932-пи йисан гьаму жилариина шагьрин тикилишчивалин сабпи устйир гъафну. Дурариз аьхю чухсагъул, фицики шагьур артмиш апIбаъ сабпи гамар алдагъдар гьадрар ву. Гъи Каспийскдихьна гьюрмат улупури, гьамушваъ яшамиш шулайи гьадму устйирин веледаризра аьхю чухсагъул», – къайд гъапIну чан улхбаъ шагьрин кIулиъ айири.
Юбилейихъди аьлакьалу шадлугънан серенжемарин дахилнаъди йигъандин арайиъ Каспийскдиъ швнуб-саб мярака кIули гъухну.
Гьадрарикан саб Каспийск шагьрин тарихнанна юрд ахтармиш апIбан музейин цIийи дарамат ачмиш апIувал вуйи. Улихьдиси дарди, гьамус музейиъ айи шей’арихъди электрондин жюрейииндира таниш хьуз шулу. «Культура» милли проектдин дахилнаъди федеральный бюджетдиан туву дакьатарихъ музей гьаму деврин техникайихъди ва гьадму гьисабнаъди хусуси вуйи электрондин панелихъдира тямин гъапIну.
Хябяхъ шули, шагьрин агьалйириз «Лезгинка» гьюкуматдин ансамбли аьхю концерт улупну. Мина, рес-публикайин Глава Сергей Меликовра кIулиъ ади, гьюрматлу хяларра дуфнайи.
Каспийскдин агьалйир шагьрин 75 йисандин юбилейихъди тебрик апIури, Сергей Меликовди къайд гъапIганси, Каспийск шагьрин агьалйир гьарсаб вахтна кIвак гъалабулугъвал кади жвуван ватандихьна янашмиш хьувалиинди жарадарихьан тафаватлу шулу.
«Ленинграддиан вуйи проектар дюзмиш апIрударра иштирак духьну, бицIи вахтан арайиъ тикмиш гъапIу шагьур — поселок Каспийдиин али Питериз ухшар вуйи шагьриз илтIибкIну.
Гьаму йисарин арайиъ Каспийскди, аьхю гьюкуматдин уьмриъ гъахьи гьядисйириъра иштирак’вал апIури, фукьан вушра дарвалар аьх гъапIну. Гъи шагьрин агьалйирин зегьметниинди ва гьунарариинди мушван артмиш’вал ужуди улихь гъябгъюра, инвестицйиринна инфраструктурайин аьхю проектар уьмриз кечирмиш апIура. ЦIийи мектебар, бицIидарин багъар, спортдиин машгъул шлу комплексар ачмиш апIура, шагьрин гьяятар ккабалгбан, рякъяр рас апIбан ляхинра улихь гъябгъюра.
Каспийск шагьриз Уьру Пайдгъин орден айи Каспийин флотилия хувалиинди вари дагъустанлуйири дамагъ апIура. Фицики думу кьибла терефнаан гьюкуматдин хатIасузвал уьбхюрайи баруси гьисаб шула.
Гьамусдихъантина вуйи йисарира Каспийскдиъ хъанара гизаф хъуркьувалар ишри. Хъа шагьур артмиш хьпан бадали ва мушваъ гъулайвалар апIбаъ учхьан шлуб вари апIидича», – гъапну рес-публикайин Главайи.
Хъасин Сергей Меликовди Каспийск шагьрин агьали Энвер Небиев «Урусатдин Игит» ччвур тувувалихъди тебрик гъапIну. Чан улхбаъ Главайи Энвер Небиевдиз ва гьамусяаьт Украинайиъ кIули гъябгъюрайи хусуси метлеб айи дявдин операцияйиъ иштирак шулайи вари дагъустанлу баяриз чухсагъул мялум гъапIну.
Юбилейиз дуфнайи гьюрматнан хялар удучIвну улхбан кьяляхъ, концертдин программа давам гъапIнийи, хъа шагьрин 75 йис тамам хьпаз бахш дапIнайи мярака завариз фейерверкар деетбиинди аьхирихъна гъафнийи.
Шиклиъ: Республикайин Глава Сергей Меликовди майор Энвер Набиев «Урусатдин Федерацияйин Игит» ччвур тувбахъди тебрик апIура.
